Inilunsad ng Department of Labor and Employment (DOLE) ang programang “Kadiwa ng Pangulo para sa mga Manggagawa” sa limang lalawigan sa MIMAROPA bilang bahagi ng selebrasyon ng 2025 Labor Week.
Layunin ng Kadiwa na maikonekta nang direkta ang mga mamimili sa mga lokal na magsasaka at maliliit na negosyante (MSMEs), sa pamamagitan ng pagbebenta ng mga produkto tulad ng sariwang ani, grocery items, at lokal na kalakal sa mas murang halaga. Sa pamamagitan nito, natutulungan ang mga mamamayan na mapagaan ang kanilang gastusin habang sinusuportahan ang mga kabuhayang nakabase sa komunidad.
Sa Odiongan, Romblon, isinasagawa ang tatlong araw na caravan na magtatagal hanggang Mayo 1, kung saan tampok ang mga produkto mula sa 20 samahan at lokal na negosyante. Mabibili rito ang mga pangunahing bilihin, ani mula sa sakahan, at iba pang lokal na produkto sa abot-kayang presyo.
Sa pagbubukas ng aktibidad, binigyang-diin ni Rocky Lee Moscoso, Business Development Division Head ng DTI Romblon, ang mahalagang papel ng mga magsasaka at manggagawa sa pagpapatatag ng lokal na suplay at ekonomiya.
Samantala, pinasalamatan ni DOLE Romblon Provincial Director Philip Ruga ang pagtutulungan ng iba’t ibang ahensya para sa tagumpay ng programa.
“Hindi ito mangyayari kung kami-kami lang. Kaya nararapat lamang pasalamatan ang ating mga katuwang — DA, DSWD, DTI, at ang suporta ng LGU Odiongan at PESO. Ipinagmamalaki ng DOLE ang lahat ng manggagawa, anuman ang edad, kasarian, kalagayan, paniniwala, o pinagmulan,” pahayag ni Ruga.
Kasabay ng Kadiwa caravan, isinasagawa rin ng DOLE ang isang labor congress sa DOBS Event’s Place sa Odiongan na tumatalakay sa mga isyu ng sektor ng konstruksyon at ang pagpapalakas ng ugnayan ng mga manggagawa at employer.
