Nilinaw ng Department of Social Welfare and Development (DSWD) na hindi sapilitang ililipat sa digital platforms ang pamamahagi ng cash grants sa mga benepisyaryo ng Pantawid Pamilyang Pilipino Program (4Ps).
Sa programang “4Ps Fastbreak” ng DSWD noong Abril 23, sinabi ni Marie Grace Ponce, Division Chief ng Social Marketing Division ng 4Ps, na mananatiling pangunahing batayan ang kagustuhan ng mga benepisyaryo sa paraan ng pagtanggap ng kanilang ayuda.
“Hindi po totally magshi-shift. Yung desisyon pa rin po ay nasa beneficiaries natin dahil ang gusto po natin ay matanggap ng mga beneficiaries yung kanilang cash grants sa pinakamabilis, pinaka-episyenteng pamamaraan, at yung lesser na yung expenses na gagamitin nila,” ani DC Ponce.
Bagamat isinusulong ng ahensya ang paggamit ng digital financial platforms, tiniyak ni Ponce na ito ay bahagi lamang ng pagsunod sa direktiba ni Pangulong Ferdinand R. Marcos Jr. na palawakin ang financial inclusivity sa bansa.
Aniya, tinuturuan ngayon ang mga benepisyaryo ng 4Ps kung paano gamitin ang mga digital tools gaya ng e-wallets upang makapagbayad ng bills online, makapagpadala at tumanggap ng pera, at matutong mag-ipon.
Ayon pa kay Ponce, ang hakbang na ito ay naaayon sa Republic Act 11310 o ang batas na nag-institusyonal sa 4Ps, na nagtatakda ng pagbibigay ng capability-building activities tulad ng Family Development Sessions (FDS) upang mapaunlad ang kabuhayan at kaalaman ng mga benepisyaryo.
Ang 4Ps, na inilunsad noong 2008 at naipasa bilang batas noong 2019, ay nagbibigay ng cash grants sa mahigit 4 milyong pamilyang Pilipino upang suportahan ang edukasyon, kalusugan, at nutrisyon ng mga anak.
Ang “4Ps Fastbreak” ay isang lingguhang online program ng DSWD na pinangungunahan ni Information Officer Venus Balito ng Digital Media Service, at mapapanood tuwing Miyerkules, 11:00 ng umaga, sa opisyal na Facebook page ng DSWD.
