Muling iginiit ng Department of Social Welfare and Development (DSWD) Field Office MIMAROPA ang kanilang paninindigan sa pagiging neutral at mahigpit na pagsunod sa mga patakaran ng Commission on Elections (COMELEC) kaugnay ng pagbabawal sa electioneering at paggamit ng pondo o kagamitan ng gobyerno para sa pansariling interes sa politika.
Ipinahayag ito ng ahensya kasunod ng inilunsad na imbestigasyon ng COMELEC kaugnay ng umano’y pagdalo ng isang kasalukuyang lokal na opisyal sa isang aktibidad ng pamamahagi ng ayuda sa Occidental Mindoro.
Binigyang-diin ni COMELEC Chairman George Garcia na maituturing na “abuse of state resources” ang ganitong uri ng kilos at mahigpit na ipinagbabawal sa ilalim ng umiiral na batas sa eleksyon. “Bawal po ito at maituturing na abuse of state resources,” ayon kay Chairman Garcia sa panayam ng ABS-CBN News reporter na si Johnson Manabat.
Sa paunang pagsusuri, nilinaw ng DSWD MIMAROPA na ang nasabing aktibidad ay hindi nagbigay o namahagi ng anumang ayuda mula sa DSWD.
Naninindigan ang DSWD sa pagpapatupad ng mahigpit na polisiya upang matiyak na ang anumang pamamahagi ng ayuda ay hindi magagamit sa layuning pampulitika, lalo na sa mga panahong malapit na ang eleksyon.
Samantala, ipinabatid din ng ahensya na ang Philippine National Police (PNP) ang humahawak sa kaso upang tukuyin ang posibleng mga paglabag at ang nararapat na hakbang alinsunod sa umiiral na mga batas.
Tiniyak ng DSWD ang kanilang patuloy na pagsunod sa prinsipyo ng patas at walang kinikilingang serbisyo, at ang buong pakikipagtulungan sa mga awtoridad upang mapanatili ang integridad ng paghahatid ng serbisyo publiko.
