Pormal nang inendorso ni incumbent Mayor Trina Firmalo-Fabic si incumbent Vice Mayor Diven Dimaala bilang kanyang kapalit sa pagka-alkalde ng bayan ng Odiongan sa darating na halalan.
Naganap ito noong unang araw ng Oktubre, kasabay ng paghahain ni Dimaala ng kanyang certificate of candidacy (COC) sa Commission on Elections.
Matapos makapagpasa ng COC, itinaas ni Mayor Fabic ang kamay ni Dimaala bilang pagpapakita ng suporta para sa kanyang kandidatura.
Sa mga naunang pahayag, sinabi ni Dimaala na layon niyang ipagpatuloy ang mga nasimulang programa ng kasalukuyang alkalde para sa patuloy na pag-unlad ng bayan.
Bukod kay Dimaala, inendorso rin ni Fabic ang buong team ng mga kandidato para sa konseho, na kinabibilangan nina Wilson Fortaleza, Mayha Barangay Captain Adrian Fornal, Louie Firmalo, SB Kaila Yap, SB Juvy Faderogaya, SB Jack Fernandez, at SB Jojo Falogme.
Si Dimaala ang kauna-unahang Odionganon na naghain ng COC para sa pagka-alkalde ng Odiongan. Sa ngayon, October 3, nananatiling walang kalaban si Dimaala.
