Sigurado, marami sa atin ang nakaranas mag-apply ng trabaho o kaya ay nagtatrabaho na sa mga pribado o pampubliko mang opisina. Kaya't siguradong halos iisa ang ating naging karanasan at mga pinagdaanan bago matanggap sa trabaho. Nariyan ang pagsumite ng curriculum vitae upang isalaysay ang mga kwalipikasyon, isama na ang pagpasa sa pagsusulit pati na rin sa job interview.
Marahil ang iba ay naiinis bakit tila butas ng karayom ang pinapasok kapag nag-aapply ng trabaho. Eh, kasi ganun talaga sa isang opisina, ahensiya o kompanya. Ang hinahanap na empleyado ay dapat may taglay na kwalipikasyon kung kaya't ang paraan ng pagpili sa mga ito ay ayon sa itinakdang panuntunan ng kompanya.
Katulad na lamang sa eleksyon. Tayong mga mamamayan ang employer ng mga halal na pulitiko o opisyal ng ating bayan o bansa. Kaya't dapat lamang na tayo mismo ay magtakda ng mga tamang panuntunan sa pagpili. Hindi yung basta feeling mo lang na iboto si Juan, o kaya feeling mo lang na ayaw kay Pedro.
Katulad na lamang sa pagpili ng ihahalal na pangulo ng bansa sa Election 2022, dapat ito ay ayon sa tamang panuntunan ng ating pagboto, katulad na lamang ng mga sumusunod: may totoong takot sa Dyos, may loyalty sa konstitusyon at itinataguyod ang kapakanan ng bansa at mga mamamayan, isinusulong ang transparency at katapatan sa personal man o pampublikong transaksyon, responsibilidad at pananagutan, hanggat maaari hindi na convit sa kaso, maganda at makatotohanan ang mga plataporma de gobyerno, may subok at aprobado na track record ng serbisyo publiko – programa man ito ng kanyang pampublikong tanggapan o pribado, hindi nadawit sa kaso ng korapsyon, at sumusunod sa tamang proseso ng paggastos o paghawak ng pananalapi ng kanyang tanggapan.
Ganyan sana dapat ang ilan lamang sa mga tamang panuntunan na dapat maging basehan sa pagpili ng mga kandidato hindi ‘yung base sa wala lang, ni hindi alam kung ano ang dahilan bakit pinili si Juan o si Pedro, dahil tila nadala lang sa mga kung anong manipuladong propaganda sa social media.
Tandaan, ang mga halal na opisyal ay may termino. Sa loob ng kanilang termino, maaari silang gumawa ng mabuti at tama at maibigay ang hangad na serbisyo at programa para sa mga mamamayan, o kaya ay, magkurakot at magkamal lang ng yaman habang nasa pwesto sa loob ng kanyang termino.
Samantalang tayong mga botante ay mananatiling ordinaryong mamamayan pagkatapos ng kanilang termino. At tayo rin ang magiging tiga salo ng kung anumang iniwan ng pulitiko, mabuti man ito at may pakinabang sa atin, o kaya ay trilyones na utang, lugmok na ekonomiya, sangkatutak na pandarambong at pagwaldas sa salapi ng bayan.
Kaya ngayong Election 2022, iboto mo ang nararapat ayon sa tamang panuntunan.
