Mas kilala siya sa parliament of the streets kaysa sa local politics. Ngayon siya ay balik-Odiongan mula nang magpasyang lumahok sa lokal na pulitika. Siya ay kumakandidato ngayon bilang konsehal ng bayan ng Odiongan.
Si Ka Wilson Fortaleza ng Barangay Rizal ay mas nakilala bilang tagapagsalita ng kilusang manggagawa mula nang maging tagapagsalita ng Bukluran ng Manggagawang Pilipino (BMP, pambansang tagapangulo ng Sanlakas at ngayon naman bilang tagapagsalita ng Partido Manggagawa (PM). Kilala rin siyang advocate ng renewable energy at energy democracy bilang founding fellow ng Center for Power Issues and Initiatives (CPII) at Vice-President ng bagong tatag na Center for Empowerment Innovation and Training on Renewable Energy (CenTRE).
Mahigit dalawang dekadang nahasa si Ka Wilson sa mga larangang ito at dito siya nakilala ng marami sa nasyunal na antas bilang lider, spokesman, writer, researcher at lecturer sa mga isyung may kinalaman sa labor, urban poor, magsasaka, kababaihan, kabataan at samutsari pang mga isyu. Mababasa ang kanyang mga akdang artikulo sa ilang pahayagan at sa publikasyon ng ilang national NGOs at maging sa international.
Dito sa Romblon ay regular siyang kolumnista ng Romblon Sun at maikling panahon na naging Public Information Officer (PIO) ng lalawigan sa ilalim ni Governor Eduardo “Lolong” Firmalo. Nagbitiw bilang PIO noong Enero 2013 para tumutok sa partylist campaign ng PM. Ito ay pagtalima na rin sa alituntunin na kailangang magresign ang isang empleyado ng gubyerno kung sasangkot ito sa partisan politics .
Sa kanyang artikulo na mababasa sa Romblon Sun, ipinaliwanag ni Ka Wilson ang kanyang naging desisyon na ito na i-alok ang kanyang sarili bilang independent candidate para sa Sangguniang Bayan (SB) ng Odiongan. Ito raw ay mahalagang desisyon para sa kanya dahil mangangahulugan ito ng paglalaan ng mas malaking panahon, dunong at rekurso para sa mamamayan ng Odiongan.
Malaking pihit din daw ito sa balangkas ng kanyang bisyon ng pagbabago na dati ay nakatuon sa mga patakarang nasyunal na nakakaapekto sa buhay ng masang Pilipino, bagama’t inilinaw niya na hindi niya tatalikuran ang national at international politics kahit na siya ay nasa lokal.
“Sa nakalipas na ilang taon, sa mga pag-aaral na ginawa ko sa renewable energy at energy democracy, ang decentralization at localization ay napapanahong hakbang kung ayaw nating lalong lumubha ang kahirapan at inekwalidad sa ating bansa, gayundin ang krisis sa klima,” paliwanag ni Ka Wilson.
Bilang kandidato ay ipinaliwanag naman niya na mas pinili niyang maging independent nang sa ganun ay mapanatili niya ang kanyang malayang paninindigan sa mga usapin.
“Bilang independent, malaya kung masasabi ang nais kong sabihin, maihapag kung ano ang sa tingin ko ay tamang patakaran o batas nang walang pag-aalinlangan sa anumang affiliation. Ito ang sa tingin ko ay bentahe ng pagiging independent,” ani Fortaleza.
Sa kanyang opinyon, hindi raw malusog ang demokrasya kung ang 1 ay divided 2 lamang. Hindi rin daw lahat ay black and white. Mas makulay, mas may buhay.
Ako ay sa panig lamang ng tama at katwiran at higit sa lahat sa kapakanan ng batayang sektor ng ating lipunan – sa panig ng mayorya ng mga kasimanwa.
“Dito ako sobrang partisan. Dahil ito ang aking mundo. Ito ang aking buhay,” pahayag ni Ka Wilson.
