Mukhang pumihit na ang lamesa sa pangunahing abogado ng gobyerno na si Solicitor General Jose Calida, na inuulan ngayon ng mga kontrobersiya matapos niyang maipanalo ang “quo warranto petition” sa Korte Suprema para mapatalsik si dating Chief Justice Maria Lourdes Sereno.
Kung na-“qou warranto” niya si Sereno, aba’y mistula naman siyang “na-COA-warranto” sa puna ng Commission on Audit dahil daw sa labis-labis na allowance na nakuha ni Calida at iba pa niyang opisyal sa kaniyang taggapan noong nakaraang taon.
Ayon sa report ng COA, labis ang P10.77 milyon na nakuhang honoria ng 15 opisyal ng Office of the Solicitor General. Sa naturang halaga, P7.46 milyon nito ang napunta raw sa bossing ng ahensiya na si Calida.
Batay daw kasi sa COA Circular 85-25-E na ginawa noong April 1985, ang allowance na dapat tanggapin ng mga taga-OSG ay hindi dapat lalampas sa 50 porsiyento ng kanilang taunang sahod. Kaya kung P1.827 milyon ang buong sahod ni Calida sa isang taon, dapat daw eh nasa P913,950 lang [wala pang P1 milyon] ang dapat na honoraria na makuha niya. Aba’y malayong-malayo sa mahigit P7 milyon.
Ang depensa naman ng kampo ni Calida, wa-epek daw ang naturang circular ng COA dahil mayroong Republic Act No. 9417, o ang batas na nagpapalakas sa OSG, kung saan nakasaad na ang mga OSG lawyer eh puwedeng tumanggap ng honoraria at allowances nang walang “cap.”
Tanong ng ating kurimaw na walang trabaho, ibig ba nitong sabihin eh “sky is the limit” ang puwedeng kuning allowance at honoraria ng mga taga-OSG? Aba’y dapat yatang silipin ‘yan ng mga mambabatas kung totoo.
Pero bukod sa malaking allowance, kinukuwentiyon din kung bakit pinayagan ang security agency na pag-aari ng pamilya ni Calida na makakuha ng milyung-milyong kontrata sa gobyerno, tulad ng Department of Justice. Kahit pa sabihin na umalis na si Calida sa kanilang kompanya dahil miyembro na siya ng gobyerno, aba’y hindi pa rin yata magandang tingnan.
Sabi nga ng ating kurimaw na mahilig sa batuta, may mga transaksyon na masasabing “legally right” pero ang tanong ay kung “morally right” din ba?
But wait there’s more mga tsong.
Inaakusahan din ng isang Jocelyn Marie Acosta-Nisperos, tagasuporta ni Sereno, na itong si Calida ay mayroon daw kerida na kaniya pa raw tauhan sa opisina. Itinanggi naman ni Calida ang paratang at aminado si Nisperos na wala siyang hawak na katibayan para patunayan ang kaniyang bintang.
Pero hindi lang sa isyu ng kerida nakatutok si Nisperos, hinahalungkat din niya ang statement of asset and liabilities ni Calida kung tama ba ang isinusumite niyang ari-arian. Sabagay, kung SALN ang ginamit niyang isyu para mapatalsik si Sereno, dapat din naman siguro na patunayan ni Calida na malinis siya at sumusunod sa batas.
Iyon nga lang, bigo pa si Nisperos na makakuha ng SALN sa Civil Service Commission at ipinasa siya sa Office of the President dahil isa raw political appointee si Calida. Pero sa totoo lang, kung wala namang itinatago ang isang opisyal, hindi ba dapat proud kang ipakita ito? Sa kabila nito, sinabi na ni Pangulong Mayor Digong Duterte na hindi niya sisibakin si Calida. Pero kung hindi man siya sibakin, mag-resign kaya siya? Abangan.
Tandaan: Ang tao'y nilalang na politiko pero mas madalas ang politiko'y nanlilinlang ng tao!
(Twitter: follow@dspyrey)
