Labindalawang pribadong paaralan sa lalawigan ng Romblon ang kabilang sa mga institusyong saklaw ng Educational Service Contracting (ESC) Program ng Department of Education (DepEd) na makatatanggap ng mas mataas na subsidiya para sa mga kwalipikadong mag-aaral simula School Year 2027–2028.
Ayon sa DepEd Romblon, may 12 pribadong paaralan sa lalawigan na benepisyaryo ng programa na naglalayong mapalawak ang access ng mga mag-aaral sa pribadong junior high school at makatulong sa gastusin sa edukasyon ng kanilang mga pamilya.
Kasunod ito ng pag-apruba ng State Assistance Council sa bagong grant rates ng ESC, na unang pagsasaayos ng halaga ng subsidiya mula noong 2017.
Sa ilalim ng bagong iskema, tataas sa ₱12,000 mula sa dating ₱9,000 ang taunang subsidiya para sa bawat kwalipikadong ESC grantee sa mga paaralan sa mga lugar na hindi kabilang sa National Capital Region (NCR) at highly urbanized cities (HUCs), kabilang ang mga kalahok na paaralan sa Romblon.
Samantala, tataas sa ₱17,500 mula sa ₱13,000 ang taunang grant para sa mga benepisyaryo sa NCR, habang ₱14,500 naman mula sa dating ₱11,000 ang matatanggap ng mga kwalipikadong grantee sa mga paaralan sa HUCs sa labas ng NCR.
Nilinaw ng DepEd na ang subsidiya ay direktang ibinabayad sa mga pribadong paaralang kalahok sa programa para sa mga kwalipikadong mag-aaral na naka-enrol doon. Hindi ito direktang cash assistance na ibinibigay sa mga mag-aaral o kanilang mga magulang.
Sa halip, nakatutulong ang grant na sagutin ang bahagi ng mandatory tuition at miscellaneous fees ng mga benepisyaryo. Ayon sa DepEd, tinatayang 34 hanggang 50 porsiyento ng naturang mga bayarin ang maaaring masaklaw ng bagong subsidiya.
Saklaw ng ESC Program ang apat na magkakasunod na taon ng junior high school, mula Grade 7 hanggang Grade 10, basta patuloy na natutugunan ng benepisyaryo ang mga itinakdang kondisyon ng programa at naka-enrol sa kalahok na paaralan.
Para sa Romblon, inaasahang makatutulong ang pagtaas ng grant sa mga pribadong paaralang kalahok sa programa at sa mga pamilyang may mga anak na kwalipikadong makatanggap ng subsidiya, sa pamamagitan ng karagdagang suporta sa gastusin sa kanilang edukasyon.
