Nilinaw ni Police Captain Manuel Fernandez Jr., hepe ng Odiongan Municipal Police Station na walang katutuhanan ang mga kumalat na post nitong nakaraang araw kaugnay sa di umano'y mga kahina-hinalang lalaki na nag-iikot sa bayan na posibleng magdulot ng kapamahakan.
Sa pahayag ni Fernandez nang ito ay dumalo sa Kapihan sa PIA-Romblon nitong Lunes ng hapon, sinabi nito na nakarating sa kanila ang posts ng isang netizen ngunit wala naman umanong nagsumbong sa kanilang opisina.
“Gusto natin ipaalam sa publiko, lalo na sa mga gumagamit ng social media na huwag basta basta maniniwala sa mga statement na nakapost na di umano ay may mga kahina-hinalang tao na nag-iikot na posibleng makadisgrasya sa ating mga mamayan sa Odiongan,” ayon kay Fernandez.
“Kami po sa Odiongan MPS ay walang tigil sa pagbabantay at pagpapatrolya sa buong Odiongan para mapanatili natin ang katahimikan at kaayusan ng bayan,” dagdag ni Fernandez.
Hiniling rin ni Fernandez sa publiko na magsumbong sa kanilang opisina o sa kanilang hotline kung sakaling may makitang mga kahina-hinalang mga tao.
“Kung kayo po ay nalalaman na impormasyon jan o di kaya ay nasaksihan na mga, any untowards incidents, illegal activity, or kung may makita na wanted persons or kahina-hinalang mga tao na pwedeng makadisturbo sa bayan ng Odiongan, ay makipag-ugnayan agad sa Odiongan Municipal Police Station para ma-validate natin ‘yung report,” dagdag ni Fernandez.
Maaring maabot ang Odiongan Municipal Police Station sa pamamagitan ng kanilang hotline na: 09985988207.
