Target ng Philippine Health Insurance Corporation (PhilHealth) Romblon na maglagay ng karagdagang assistance desks sa mga pangunahing isla ng lalawigan sa susunod na taon upang mailapit sa mga residente ang mga serbisyo ng ahensya at mabawasan ang pangangailangang bumiyahe pa patungo sa kanilang tanggapan sa Odiongan.
Sa panayam sa Kapihan sa PIA Romblon, sinabi ni Leandro Flores, Chief Health Insurance Officer ng PhilHealth Romblon, na nakikipag-ugnayan na ang kanilang tanggapan sa Pamahalaang Panlalawigan para sa planong pagtatatag ng assistance desk sa bayan ng Romblon at sa Sibuyan District Hospital sa Cajidiocan.
Nakikipag-ugnayan din ang ahensya sa lokal na pamahalaan ng San Agustin upang magkaroon ng kaparehong serbisyo sa nasabing bayan.
Bahagi ito ng layunin ng PhilHealth na magkaroon ng mas malawak na presensya sa mga isla ng lalawigan, partikular sa mga lugar na malayo sa kanilang pangunahing tanggapan.
“Dahil isla tayo, isa ito sa aking adhikain na hindi na kailangang pumunta sa opisina ang mga tao para lang mag-transact sa PhilHealth,” ayon kay Flores.
“Layunin talaga namin na kami na ‘yung lumapit sa tao kasi nga hindi madali pumunta sa Odiongan kung sila ay nasa malalayong isla kagaya ng Sibuyan. Kaya naisip namin kung bakit pupunta pa sa opisina kung puwede namang kami ang pumunta sa kanila?” dagdag niya.
Sa mga assistance desk, maaaring asikasuhin ng mga miyembro ang iba't ibang transaksyon tulad ng pagpaparehistro, pag-update ng kanilang membership records, pagkuha o pag-print ng Member Data Record (MDR) at PhilHealth ID, gayundin ang iba pang serbisyong maaaring ibigay ng ahensya.
Nauna nang lumagda ang PhilHealth at lokal na pamahalaan ng Odiongan sa isang Memorandum of Agreement para sa pagtatatag at operasyon ng PhilHealth Assistance Desk sa Rural Health Unit (RHU) ng bayan.
Ayon kay Flores, mayroon na ring assistance desk sa bayan ng Looc, habang isinusulong naman ang pagtatatag ng mga karagdagang desk sa iba pang lugar sa lalawigan.
Sa pamamagitan ng mga planong assistance desk, inaasahang mas mapapadali para sa mga residente, partikular sa mga nakatira sa malalayong isla, ang pag-access sa mga serbisyo ng PhilHealth nang hindi na kinakailangang bumiyahe patungo sa Odiongan para sa mga karaniwang transaksyon.


























