Umabot na sa mahigit 300,000 ang bilang ng mga rehistradong miyembro ng Philippine Health Insurance Corporation (PhilHealth) sa lalawigan ng Romblon, na lumampas sa inaasahang membership target batay sa 2024 Census of Population and Housing.
Ayon kay Leandro Flores, Chief Health Insurance Officer ng PhilHealth Romblon, naabot at nalampasan na ng tanggapan ang itinakdang target nito pagdating sa membership kumpara sa populasyon ng lalawigan batay sa datos ng Philippine Statistics Authority (PSA).
“Pagdating sa membership, na-exceed na ng PhilHealth Romblon ‘yung expected target base sa 2024 Census. Sa kasalukuyan, sa populasyon ng Romblon ay 100% na kami. Kahit sa PSA, isa sa mga partner namin, versus doon sa mga miyembro namin sa Romblon province, ay exceeded na,” pahayag ni Flores.
Dahil nalampasan na ang target sa pagpaparehistro, sinabi ni Flores na tututukan naman ngayon ng PhilHealth ang pagpapalawak at pagpapabilis ng pagpapatupad ng Yaman ng Kalusugan Program (YAKAP) upang mas maraming miyembro ang aktuwal na makagamit ng mga serbisyong pangkalusugan.
Binigyang-diin niya na hindi sapat na rehistrado lamang ang mga mamamayan sa PhilHealth dahil mahalaga ring maunawaan nila ang kanilang mga benepisyo at mahikayat na gamitin ang mga serbisyong maaari nilang mapakinabangan.
Ayon kay Flores, nais ng PhilHealth na mabago ang nakasanayang pananaw ng ilang mamamayan na mag-atubiling magpatingin sa doktor o magpa-checkup dahil sa pangamba sa gastusin.
“Gusto namin na mabago ‘yung kultura at mauunawaan ng miyembro. Kasi dapat ‘yung mga tao, mga miyembro ng PhilHealth lalo dito sa Romblon, ay hindi tayo mahiya, hindi tayo matatakot magpa-checkup kasi unang-una, libre po ito,” ani Flores.
Sa ilalim ng YAKAP, hinihikayat ang mga miyembro na magparehistro sa kanilang napiling accredited YAKAP facility upang makagamit ng mga serbisyong pang-primary healthcare, kabilang ang konsultasyon, mga pagsusuring medikal at iba pang benepisyong saklaw ng programa.
Samantala, kinikilala rin ng PhilHealth ang mga hamong kinakaharap ng ilang residente sa pagpunta sa mga pasilidad pangkalusugan, partikular ang gastos sa pamasahe at kakulangan sa oras.
Dahil dito, sa halip na hintayin lamang ang mga mamamayan na pumunta sa kanilang mga tanggapan, isinasagawa rin ng PhilHealth Romblon ang pagpunta sa iba't ibang barangay, paaralan at iba pang lugar upang mailapit ang impormasyon at serbisyo sa mga residente.
Ayon kay Flores, bahagi ito ng pagsisikap ng ahensya na mas maraming miyembro ang maabot at mahikayat na magamit ang kanilang mga benepisyo.


























