Tampok ang pagkamalikhain at malasakit sa kalikasan sa isinagawang Heroween Party ng Love Angel Society Inc., isang non-government organization (NGO) na naglalayong hikayatin ang mga pamilya na muling gamitin ang mga materyales na karaniwang itinatapon.
Bilang bahagi ng aktibidad, hinamon ang mga magulang at mga batang kalahok na lumikha ng mga kakaiba at malikhaing kasuotang pang-Halloween gamit ang mga recycled at discarded materials tulad ng bubble wrap, egg trays at iba pang mga bagay na maaari pang mapakinabangan.
Ipinakita sa nasabing aktibidad ang talento at pagiging malikhain ng mga magulang sa paggawa ng mga makukulay at natatanging kasuotan, na nagbigay rin ng pagkakataon sa mga bata na maipamalas ang kanilang kumpiyansa at kasiyahan sa pagsali sa programa.
Higit pa sa pagiging isang masayang pagdiriwang, layunin ng inisyatiba na palawakin ang kamalayan ng komunidad tungkol sa wastong pamamahala ng basura at kahalagahan ng muling paggamit ng mga materyales.
Ayon sa Love Angel Society Inc., mahalagang maisulong ang ganitong mga gawain lalo't walang umiiral na dumpsite sa kanilang lugar, kaya nais nilang mahikayat ang bawat pamilya na baguhin ang pananaw sa mga itinatapong bagay at makita ang mga ito bilang mga materyales na maaari pang magamit sa ibang paraan.
Binigyang-diin din ng organisasyon ang mahalagang papel ng mga magulang na naglaan ng oras, pagsisikap at pagkamalikhain upang mabuo ang mga kasuotang naging tampok sa aktibidad.
