Sumailalim sa random drug testing ang mga tricycle driver sa bayan ng Odiongan bilang bahagi ng magkasanib na aktibidad ng Philippine Drug Enforcement Agency (PDEA) Romblon at mga katuwang na ahensya sa ilalim ng Oplan Harabas 2026 noong Lunes, Oktubre 26.
Pinangunahan ng PDEA Romblon Provincial Office ang aktibidad, katuwang ang Odiongan Municipal Police Station, Department of Health (DOH)-Romblon, lokal na pamahalaan ng Odiongan, Philippine Army, Land Transportation Office (LTO)-Odiongan, at Philippine National Police-Highway Patrol Group (PNP-HPG) Romblon.
Layunin ng random drug testing na suportahan ang kampanya ng pamahalaan laban sa ilegal na droga at makatulong sa pagpapanatili ng kaligtasan ng mga pasahero at iba pang gumagamit ng kalsada.
Kasama rin sa mga layunin ng Oplan Harabas 2026 ang pagpapalakas ng koordinasyon ng mga ahensya sa pagpapatupad ng batas, pagtataguyod ng kapayapaan at kaayusan, at paghikayat sa publiko na sumunod sa mga umiiral na batas at regulasyon.
Ayon sa PDEA Romblon, patuloy ang pakikipagtulungan nito sa mga katuwang na ahensya upang palakasin ang kampanya laban sa ilegal na droga at maisulong ang kaligtasan at kapakanan ng mga mamamayan.
