Inilabas na ng National Disaster Risk Reduction and Management Council (NDRRMC) ang implementing rules and regulations (IRR) ng Republic Act No. 12287, o ang Declaration of State of Imminent Disaster Act, na naglalayong gawing bahagi ng disaster management ang maagap na pagkilos bago pa tumama ang isang kalamidad.
Nilagdaan ni Pangulong Ferdinand R. Marcos Jr. ang RA 12287 noong September 12, 2025. Sa ilalim ng batas, maaaring magdeklara ng State of Imminent Disaster bago mangyari ang isang kalamidad, batay sa scientific forecasts, risk assessments at iba pang kaugnay na impormasyon.
Maaaring magdeklara ang Pangulo ng State of Imminent Disaster sa mga lugar na inaasahang makakaranas ng malala at mataas ang posibilidad na hazard, batay sa rekomendasyon ng NDRRMC o mga local chief executive at payo ng Regional Disaster Risk Reduction and Management Councils (RDRRMCs), sa pamamagitan ng executive order.
Saklaw ng IRR ang mga hazard na inaasahang magkakaroon ng catastrophic impacts at nakategorya bilang “severe” o katumbas nito, batay sa forecast at resulta ng pre-disaster risk assessment.
Itinatakda rin nito ang mga anticipatory action na maaaring ipatupad bago ang inaasahang epekto ng hazard o kaagad matapos ideklara ang State of Imminent Disaster. Kabilang dito ang maagap na pagpapalabas ng advisories at impormasyon, gayundin ang mobilization at strategic prepositioning ng mahahalagang suplay at operational assets.
May mga panuntunan din para sa pre-emptive evacuation at infrastructure protection, kabilang ang evacuation protocols, camp coordination and camp management, proteksyon at mobilization ng internally displaced persons, at pakikilahok ng Accredited Community Disaster Volunteers, civil society organizations, private sector at iba pang volunteer groups.
Para sa monitoring, reporting at evaluation, inatasan ang Office of Civil Defense (OCD) na magsagawa ng monitoring sa mga lugar na ideklarang nasa ilalim ng State of Imminent Disaster.
Inaatasan naman ang mga concerned government agency na magsumite sa OCD, sa loob ng 45 araw mula sa pagtanggal ng State of Imminent Disaster, ng ulat hinggil sa status ng mga local declaration, paggamit ng anticipatory action funds at tinatayang economic at social costs.
Kailangang isama ng mga national government agency ang anticipatory action measures sa kanilang regular programs, projects and activities at pondohan ang mga ito mula sa kanilang regular agency budgets.
Para naman sa mga local government unit (LGU), maaari nilang isama ang anticipatory action measures sa kanilang Local DRRM Plan at Local DRRM Plan Investment Plan. Maaari ring maglaan ng hindi lalampas sa 10 porsyento ng 70 porsyento ng Local DRRM Fund (LDRRMF) para sa mga naturang hakbang.
Nilagdaan ang IRR noong September 14, 2026 ni Defense Secretary Gilberto Teodoro Jr., na siya ring chairperson ng NDRRMC.
Discussion about this post