Arestado ng Romblon Police Provincial Office (RPPO) ang isang lalaking wanted sa apat na kaso sa isinagawang pagpapatupad ng mga warrant of arrest sa Barangay Poblacion, Calatrava, Romblon dakong alas-11:00 ng umaga nitong September 25, 2026.
Isinagawa ang operasyon ng mga tauhan ng Calatrava Municipal Police Station (MPS) sa pangunguna ni PCPT Eric Herald R. Faigao, Officer-in-Charge, katuwang ang Romblon Provincial Mobile Force Company (PMFC) at Highway Patrol Group (HPG)-Odiongan.
Ang pag-aresto ay isinagawa batay sa apat na warrant of arrest na inilabas noong September 24, 2026 ng Regional Trial Court Branch 82 sa Odiongan, Romblon.
Kaugnay ang mga warrant sa dalawang bilang ng Statutory Acts of Lasciviousness, isang bilang ng Acts of Lasciviousness, at isang bilang ng Lascivious Conduct. Umabot sa ₱476,000 ang kabuuang inirekomendang piyansa para sa apat na kaso.
Ayon sa RPPO, resulta ang pagkakaaresto ng intelligence-driven operations ng Calatrava MPS, katuwang ang Romblon PMFC at HPG-Odiongan, bilang bahagi ng pinaigting na kampanya ng Philippine National Police laban sa kriminalidad.
Matapos ang pagkakaaresto, ipinaalam sa akusado ang kanyang mga karapatan sa ilalim ng Miranda Doctrine at Anti-Torture Act of 2009 bago dinala sa kustodiya ng Calatrava MPS para sa dokumentasyon, medical examination at kaukulang disposisyon.
Gumamit din ang operating team ng isang body-worn camera (BWC) at dalawang alternative recording devices (ARDs) sa pagpapatupad ng mga warrant, alinsunod sa mga direktiba ng korte at polisiya ng PNP sa transparency at accountability.
Pinuri ni Romblon Police Provincial Director PCOL Rexton F. Sawi ang mga operating unit sa kanilang propesyonalismo at dedikasyon sa matagumpay na pagpapatupad ng mga warrant.
Patuloy namang hinihikayat ng RPPO ang publiko na makipagtulungan sa law enforcement authorities sa pamamagitan ng pagbibigay ng napapanahon at tumpak na impormasyon na makatutulong sa pagpapanatili ng kapayapaan, kaayusan at hustisya sa lalawigan.
Discussion about this post