Nailigtas ng mga kapwa mangingisda ang anim na sakay ng isang bangkang lumubog sa karagatan ng Romblon, Romblon noong gabi ng Nobyembre 9.
Ayon kay Joel Silverio, boat captain ng bangkang sumaklolo, nakatanggap sila ng tawag mula sa kapitan ng Barangay Alad hinggil sa naiulat na insidente at sa mga sakay ng lumubog na bangka.
Nasa laot umano sila at nangingisda nang matanggap ang impormasyon kaya agad nilang hinanap ang mga sakay ng bangkang may pangalang Van Ahtena.
Matapos matagpuan ang anim na sakay, agad silang isinagip at dinala pabalik sa lupa upang mabigyan ng kaukulang tulong ng mga awtoridad.
Kinilala ang mga nailigtas na pawang residente ng Barangay Bagacay sa bayan ng Romblon.
Naging mahalaga ang mabilis na pagtugon ng mga mangingisda matapos matanggap ang ulat tungkol sa lumubog na bangka, na nagbigay-daan sa agarang pagsagip sa anim na sakay nito.
Wala pang ibinigay na detalye hinggil sa sanhi ng paglubog ng bangka at kung may iba pang napinsala sa insidente.
