Nakatanggap ang lokal na pamahalaan ng Corcuera ng bagong garbage compactor truck mula sa Pamahalaang Panlalawigan ng Romblon upang mapahusay ang koleksiyon at pamamahala ng basura sa isla ng Simara.
Pinondohan ang sasakyan mula sa 20% Development Fund ng Provincial Government of Romblon (PGR), kasunod ng kahilingan ni Mayor Elmer Fruelda at ng lokal na pamahalaan ng Corcuera.
Ayon sa Provincial Information Office, layunin ng bagong garbage compactor truck na mapabilis at maging mas episyente ang pangongolekta at paghakot ng basura sa mga komunidad ng bayan.
Inaasahang makatutulong din ito sa pagpapanatili ng kalinisan ng kapaligiran at pag-iwas sa mga suliraning pangkalusugan na maaaring dulot ng hindi maayos na pagtatapon at pamamahala ng basura.
Sa pamumuno ni Governor Trina Firmalo-Fabic, sinabi ng pamahalaang panlalawigan na patuloy nitong sinusuportahan ang mga proyektong pangkalikasan at pangkaunlaran na pakikinabangan ng mga lokal na pamahalaan sa buong lalawigan.
