Hinimok ni Sen. Bam Aquino ang pamahalaan na pag-aralan ang pagtanggal ng 12 porsiyentong value-added tax (VAT) sa residential electricity upang makatulong na mapababa ang buwanang bayarin sa kuryente ng mga pamilyang Pilipino.
Ayon kay Aquino, mas malaking ginhawa para sa mga consumer ang maaaring maidulot ng VAT exemption sa kuryente para sa mga residential customer, lalo na kung sasabayan ito ng mga hakbang upang alisin ang system loss charges na umaabot sa humigit-kumulang 5 hanggang 6 porsiyento ng electricity charges.
“Kung tatanggalin po iyong VAT sa kuryente ng mga residential – hindi po mga negosyo, mga factory, but just residential – this could mean a bigger drop in the electricity bill of our citizens,” ani Aquino sa isang pahayag nitong Miyerkules, na binanggit ang kanyang pahayag sa isinagawang Development Budget Coordination Committee (DBCC) briefing.
Naghain na si Aquino ng Senate Bill No. 266, na naglalayong gawing VAT-exempt ang pagbebenta ng kuryente ng generation, transmission at distribution companies, gayundin ng mga electric cooperative.
Saklaw din ng panukala ang VAT exemption sa mga serbisyong ibinibigay ng mga franchise grantee ng electric utilities.
Ayon sa senador, makatutulong ang pagtanggal ng VAT upang mabawasan ang presyo ng kuryente sa pamamagitan ng pag-aalis ng buwis na ipinapasa sa mga consumer.
Bukod dito, naghain din si Aquino ng Senate Bill No. 2047, na naglalayong ibaba ang VAT rate mula 12 porsiyento tungo sa 10 porsiyento para sa mga produkto at serbisyo, kabilang ang petroleum products.
Samantala, naghain din ang senador ng Resolution No. 375 na humihiling ng legislative inquiry sa kamakailang pagtaas ng singil sa kuryente ng Manila Electric Company (Meralco).
Partikular na nais niyang siyasatin kung bakit kinakailangang pasanin ng middle-class consumers ang ilang electricity subsidies para sa mga pamilyang mababa ang kita, kabilang ang financing para sa lifeline rate subsidy at iba pang mandated electricity discounts.
Tinukoy ni Aquino ang umiiral na cross-subsidy system, kung saan ang halaga ng mga discount na ibinibigay sa marginalized sectors at senior citizens ay naipapasa sa ibang consumers sa pamamagitan ng kanilang buwanang electricity bills.
Ayon sa senador, nagreresulta ito sa karagdagang singil na nasa ₱20 hanggang ₱100 bawat buwan para sa isang karaniwang pamilya.
Binigyang-diin ni Aquino na bagama't nananatiling mahalagang prayoridad ang pagtulong sa pinakamahihirap na Pilipino, dapat aniyang manggaling sa national budget ang pondo para sa mga subsidyong ito sa halip na ipasa ang dagdag na gastusin sa electricity bills ng iba pang mga pamilyang nahihirapan din sa kanilang gastusin.
Discussion about this post