Nagkaisa ang mga kawani ng Lokal na Pamahalaan ng Cajidiocan sa isang Unity Walk bilang bahagi ng pagsisimula ng pagdiriwang ng ika-126 na Philippine Civil Service Anniversary.
Naglakad ang mga kawani patungo sa Cajidiocan View Deck, kung saan isinulong ang mensahe ng pagkakaisa at pangangalaga sa kalusugan ng mga lingkod-bayan.
Binigyang-diin sa aktibidad na ang pagpapanatili ng pisikal at mental na kalusugan ng mga empleyado ng pamahalaan ay mahalaga rin sa kanilang mahusay na paglilingkod sa komunidad. Naging pagkakataon din ang paglalakad upang masiyahan ang mga kawani sa sariwang hangin at luntiang tanawin ng Isla ng Sibuyan.
Kasabay nito, binigyang-diin ang kahalagahan ng pangangalaga sa kalikasan, na itinuturing na pananagutan hindi lamang ng mga kawani ng pamahalaan kundi ng buong komunidad.
Ibinahagi naman ng Civil Service Commission ang iba't ibang special anniversary perks para sa mga empleyado ng gobyerno, discounts at benepisyo na maaaring kanilang mapakinabangan sa ilalim ng Lingkod Bayani Rewards at mga programa ng Civil Service Commission (CSC) at mga partner organization.
Kabilang dito ang mga wellness, dining at entertainment offers sa mga piling SM Malls, gayundin ang mga espesyal na promo mula sa Enchanted Kingdom, Astoria Destinations at Hotel Lucky Chinatown.
Sa pamamagitan ng Unity Walk, binigyang-diin ng LGU Cajidiocan ang kahalagahan ng pagkakaisa, kalusugan, pangangalaga sa kalikasan at kapakanan ng mga lingkod-bayan bilang bahagi ng paggunita sa mga nagsisilbi sa pamahalaan at mamamayan.
