Lumagda sa isang Usufruct Agreement ang Lokal na Pamahalaan ng Cajidiocan at Bureau of Jail Management and Penology (BJMP) MIMAROPA, na magbibigay-daan sa pagtatayo ng Sibuyan District Jail sa isla.
Pinangunahan ni Cajidiocan Mayor Atty. Marvin Ramos at BJMP MIMAROPA Regional Director Senior Superintendent Deogracias F. De Castillo ang seremonya ng paglagda sa kasunduan para sa paggamit ng lupang paglalagyan ng planong pasilidad.
Ayon kay De Castillo, mahalaga ang pagkakaroon ng sariling kulungan sa Sibuyan dahil sa kasalukuyan ay kinakailangan pang dalhin ang mga Persons Deprived of Liberty (PDL) mula sa isla patungo sa Romblon District Jail sa Romblon Island, na nangangailangan ng pagtawid-dagat na tumatagal ng halos dalawang oras.
Sinabi naman ni Mayor Ramos na makatutulong ang pagtatayo ng Sibuyan District Jail sa mga pamilya ng mga PDL, na kailangan pang gumastos ng tinatayang ₱3,000 hanggang ₱5,000 para sa pamasahe, pagkain at tuluyan tuwing dadalaw sa kanilang mga kaanak o dadalo sa mga pagdinig sa korte.
“Ang kulungan ay hindi para parusahan ang ating mga kababayan, kundi para bigyan sila ng pagkakataong magbago,” pahayag ni Ramos.
Dumalo rin sa naturang aktibidad ang mga miyembro ng Sangguniang Bayan, mga punong barangay sa pangunguna ni ABC President Angie, at mga opisyal ng Barangay Alibagon sa pangunguna ni Barangay Captain Rose Roco.
Naging saksi rin sa paglagda ang mga kinatawan mula sa Bureau of Fire Protection, Philippine Coast Guard, Army Reserves, Municipal Disaster Risk Reduction and Management Office at SK Federation.
Sa pamamagitan ng kasunduan, inaasahang maisusulong ang pagtatayo ng Sibuyan District Jail, na magsisilbi sa mga bayan sa Sibuyan Island at magpapalapit sa mga serbisyong may kaugnayan sa pangangalaga at pamamahala sa mga PDL.
