Tampok ang iba't ibang produktong agrikultural, pangisdaan, processed products at mga likhang-kamay sa ginaganap na Kalipayan Agri-Trade Fair 2026 sa bayan ng San Agustin, Romblon.
Ipinapakita sa fair ang mga produktong mula sa pangunahing kabuhayan ng mga residente, kabilang ang mga gulay, prutas, isda, sihi at iba pang seafoods, gayundin ang mga processed seaweed products.
Kabilang din sa itinatampok ang mga produktong yaring-kamay tulad ng walis, atsara mula sa mga gulay, at iba't ibang palaman na gawa sa mga prutas tulad ng bignay.
Bukod sa mga produktong ipinagbibili, tampok din sa selebrasyon ang mga float na pinalamutian ng mga produktong mula sa kani-kanilang barangay.
May kanya-kanya ring stall ang mga barangay sa Market Day Site, kung saan idinaraos ang programa at pagbebenta ng mga lokal na produkto.
Layunin ng pagsasagawa ng Kalipayan AgroTrade Fair na mabigyan ng pagkakataon ang mga lokal na magsasaka, mangingisda at maliliit na negosyante na maipakilala at maibenta ang kanilang mga produkto sa mas maraming mamimili.
Bahagi ang aktibidad ng pagdiriwang ng Kalipayan Festival 2026, na nagbibigay-pugay sa mga lokal na produkto at kabuhayan ng mga mamamayan ng San Agustin.
