Naghahanda ang Philippine Crop Insurance Corp. (PCIC) ng tinatayang ₱36 milyon insurance payouts para sa 5,005 magsasaka na napinsala ang insured farms dahil sa Bagyong Luis, Bagyong Maymay at Habagat mula Agosto 1 hanggang 11.
Ayon kay PCIC President Jovy Bernabe sa paunang ulat kay Agriculture Secretary Francisco P. Tiu Laurel Jr., pinakilos na ng state crop insurer ang mga regional office nito upang i-validate ang mga pinsala at mapabilis ang pagproseso ng mga insurance claims.
Tinatayang nasa ₱35.67 milyon ang insured damage sa anim na rehiyon. Pinakamaraming magsasaka ang naapektuhan sa Region III na may 1,836, sinundan ng Region I na may 1,218 at Region IV-B o MIMAROPA na may 836 magsasaka.
Pinakamalaki naman ang tinatayang insured damage sa Region I na ₱9.89 milyon, sinundan ng Region III na ₱8.80 milyon at Region IV-B na ₱7.56 milyon. Nagtala rin ng ₱5.04 milyon ang Region IV-A, ₱3.47 milyon sa Region II at ₱920,000 sa Region VI.
Pinakamalaking bahagi ng insured losses ay mula sa palay na umabot sa ₱25.60 milyon, habang tinatayang ₱3.55 milyon ang pinsala sa mais at ₱3.73 milyon naman sa high-value crops.
Binigyang-diin ni Laurel ang kahalagahan ng mabilis na pag-abot ng tulong sa mga magsasaka at mangingisdang naapektuhan ng kalamidad upang hindi maging pangmatagalang problema sa kabuhayan ang kanilang pagkalugi.
“We need to respond immediately to the needs of our farmers and fisherfolk after every calamity so they can recover quickly and sustain their livelihoods,” ani Laurel.
Samantala, sinabi ni Bernabe na pinaiigting ng PCIC ang damage assessment at claims processing, kabilang ang paggamit ng mga bagong teknolohiya upang mapabilis ang pagsusuri sa mga napinsalang sakahan.
Patuloy ding inaatasan ng PCIC ang mga regional office nito na tulungan ang mga apektadong magsasaka at pabilisin ang pagproseso ng mga lehitimong claims.
Gayunman, maaari pang magbago ang paunang pagtataya habang nagpapatuloy ang field validation.
Ayon sa PCIC, maaaring makinabang sa premium-free crop insurance ang mga magsasaka at mangingisdang nakarehistro sa Registry System for Basic Sectors in Agriculture (RSBSA), basta't magpatala sa PCIC bawat planting season o kapag nagpaparami ng bagong livestock.
Maaari ring iseguro ang mga farm equipment at iba pang agricultural assets.
Para sa mga magsasaka, mahalaga ang mabilis na insurance payout dahil maaari itong gamitin sa muling pagtatanim, pagpapalit ng nasirang farm inputs at pagtugon sa agarang gastusin upang maipagpatuloy ang susunod na production cycle.
