Nilagdaan nitong August 13 ang isang Memorandum of Agreement (MOA) sa pagitan ng Department of Education (DepEd), Commission on Higher Education (CHED), at Technical Education and Skills Development Authority (TESDA) upang ganap na maisulong ang TRIFOCALIZATION OF EDUCATION SYSTEM sa lalawigan ng Romblon.
Ang inisyatiba ay isinulong ni Congressman Eleandro “Budoy” Madrona upang mapalakas ang ugnayan ng basic education, technical-vocational training, higher education at paghahanda sa mundo ng trabaho.
Lumagda sa kasunduan sina DepEd Regional Director Ronnie Mallari, TESDA Regional Director Baron Lagran at CHED Regional Director Edna Legazpi.
Sinaksihan ang paglagda nina Romblon State University President Dr. Merian Mani, TESDA Romblon Provincial Director Atty. Glen Sartillo, DepEd Romblon Schools Division Superintendent Roger Capa at mga municipal mayor ng lalawigan.
Ang TRIFOCALIZATION OF EDUCATION SYSTEM ay itinataguyod ng Republic Act 10968 o Philippine Qualifications Framework (PQF) Act, na naglalayong pag-ugnayin ang batayang edukasyon, teknikal-bokasyonal na pagsasanay, at mas mataas na edukasyon tungo sa isang pinag-isang pamantayan na mas tumutugon sa pangangailangan ng kasalukuyang panahon.
Sa madaling salita, layunin ng sistemang ito na pag-ugnayin ang high school, technical-vocational training, at kolehiyo. Ang mga natutuhan at kasanayan sa bawat antas ay maaaring magamit sa susunod na hakbang—tulad ng pagpapatuloy ng pag-aaral, pagkuha ng karagdagang training, o pagpasok sa trabaho.
Sa pamamagitan nito, mas nagiging malinaw ang mga pagpipilian ng kabataan at mas napaghahandaan sila para sa trabaho at iba pang oportunidad sa hinaharap, ayon sa mga opisyal.
