Nilagdaan nitong August 13 ang isang Memorandum of Agreement (MOA) sa pagitan ng Department of Education (DepEd), Commission on Higher Education (CHED), at Technical Education and Skills Development Authority (TESDA) upang magkaroon ng mas konektado at responsive na sistema ng edukasyon sa lalawigan ng Romblon.
Ang inisyatiba ay isinulong ni Congressman Eleandro “Budoy” Madrona upang mapalakas ang ugnayan ng basic education, technical-vocational training, higher education at paghahanda sa mundo ng trabaho.
Lumagda sa kasunduan sina DepEd Regional Director Ronnie Mallari, TESDA Regional Director Baron Lagran at CHED Regional Director Edna Legazpi.
Sinaksihan ang paglagda nina Romblon State University President Dr. Merian Mani, TESDA Romblon Provincial Director Atty. Glen Sartillo, DepEd Romblon Schools Division Superintendent Roger Capa at mga municipal mayor ng lalawigan.
Sa isang Facebook post ni SDS Capa, sinabi niya na sa pamamagitan ng mas maayos na koordinasyon ng tatlong pangunahing ahensya sa edukasyon, layunin ng kasunduan na magkaroon ng mas tuloy-tuloy na pathway ang mga mag-aaral mula basic education patungo sa technical-vocational training, higher education, at kalaunan ay sa employment.
Binigyang-diin sa inisyatiba na kapag mas magkakaugnay ang mga bahagi ng education system, mas maraming oportunidad ang maaaring mabuksan para sa mga kabataang Romblomanon at mas maihanda sila para sa kanilang nais na career at kabuhayan.
Discussion about this post