Sinimulan na ng Lokal na Pamahalaan ng Odiongan ang pamamahagi ng tig-5 kilong bigas sa 15,564 na kabahayan sa buong bayan sa ilalim ng Local Government Support Fund (LGSF) ng pambansang pamahalaan.
Ang rice assistance ay bahagi ng programa ng administrasyon ni Pangulong Ferdinand R. Marcos Jr. na naglalayong makatulong sa mga pamilya sa gitna ng patuloy na pagtaas ng presyo ng mga pangunahing bilihin at mapalakas ang food security sa mga lokal na komunidad.
Ayon sa Lokal na Pamahalaan ng Odiongan, ipinatupad ang programa batay sa prinsipyo na walang pamilyang Odionganon ang dapat maiwan sa pagtanggap ng ayuda. Dahil dito, ang alokasyon ng bigas ay ginamit sa paraang mabigyan ng suporta ang bawat household sa buong bayan.
Ipinaliwanag ng LGU na ang implementasyon ng programa ay isinagawa batay sa prinsipyo ng equitable distribution, na rekomendasyon ng Municipal Planning and Development Coordinator (MPDC) batay sa Community-Based Monitoring System (CBMS) data, Executive Committee, at Local Finance Committee.
Dahil kabilang ang Odiongan sa mga bayan na may malaking bilang ng mga kabahayan, sinabi ng lokal na pamahalaan na isinagawa ang alokasyon ng pondo upang matiyak na lahat ng target na benepisyaryo ay mabibigyan ng rice assistance. Dahil dito, maaaring magkaiba ang dami ng naipamahaging bigas sa iba't ibang bayan sa lalawigan, depende sa pondong inilaan at bilang ng mga household na sakop ng programa.
Ayon pa sa LGU, sinunod din ang lahat ng kinakailangang proseso bago isinagawa ang distribusyon. Bagama't nagkaroon ng pagkakaiba sa iskedyul ng implementasyon kumpara sa ibang lokal na pamahalaan, tiniyak nitong naging maayos, organisado, at responsable ang paghahatid ng serbisyo sa bawat barangay.
Sa kasalukuyan, nagpapatuloy ang pamamahagi ng rice assistance sa lahat ng barangay batay sa itinakdang iskedyul, at inaasahang makukumpleto ang distribusyon sa lahat ng target na benepisyaryo hanggang Biyernes.
Discussion about this post