Pinalalakas ng Department of Social Welfare and Development (DSWD) Field Office MIMAROPA ang kahandaan nito sa pagtugon sa mga sakuna sa Romblon sa pamamagitan ng pagpreposition ng mga relief supplies sa provincial warehouse upang matiyak ang agarang paghahatid ng ayuda sa mga maaapektuhang komunidad.
Kabilang ang Romblon sa mga lalawigang may nakaimbak na Family Food Packs (FFPs), Ready-to-Eat (RTE) food items, at Non-Food Items (NFIs) na estratehikong inilagay sa mga regional at provincial warehouses sa MIMAROPA bilang paghahanda sa mga kalamidad at iba pang emergency.
Sa buong rehiyon, umabot sa 161,146 Family Food Packs, 33,098 Ready-to-Eat food items, at 29,320 Non-Food Items ang nakaposisyon para sa agarang distribusyon sa mga apektadong pamilya.
Ayon sa DSWD MIMAROPA, ang kabuuang halaga ng mga nakaimbak na Family Food Packs ay ₱98.05 milyon, habang ₱26.08 milyon naman ang halaga ng mga Ready-to-Eat food items at ₱30.60 milyon para sa mga Non-Food Items tulad ng hygiene kits at sleeping kits.
Mayroon ding ₱2.07 milyong standby funds na nakalaan upang magamit sa agarang disaster response operations kapag kinakailangan.
Ipinaliwanag ng DSWD na ang mga relief supplies ay estratehikong inilagay sa iba't ibang warehouse, kabilang ang sa Romblon, upang mapabilis ang mobilisasyon at pamamahagi ng tulong sa mga lugar na maaapektuhan ng kalamidad.
Sa pakikipagtulungan ng mga Local Government Units (LGUs) at iba pang partner agencies, sinabi ng DSWD MIMAROPA na patuloy nitong pinaiigting ang disaster preparedness at response operations upang matiyak ang maagap, episyente, at angkop na paghahatid ng tulong sa mga pamilyang nangangailangan.
