Tatlong katao ang nasa kustodiya na ng pulisya kaugnay ng pagpatay sa American marine biologist na si Dr. Kent Carpenter sa Sibulan, Negros Oriental, habang nagpapatuloy ang paghahanap sa isa pang suspek na pinaniniwalaang sangkot sa krimen.
Sa virtual press briefing noong Hulyo 16, sinabi ni Negros Oriental Police Provincial Office (NORPPO) Director Col. Timmar Alam na dalawang suspek ang naaresto sa magkahiwalay na operasyon noong Miyerkules ng gabi, habang kusang-loob namang sumuko ang ikatlong suspek madaling araw ng Huwebes matapos malaman na naaresto na ang dalawa niyang kasama.
Kinilala lamang ng pulisya ang mga suspek sa kanilang mga alyas na “MO,” 26; “JF,” 40; at “CD,” 21, pawang mga residente ng Sibulan, Negros Oriental.
Inihahanda na ng pulisya ang kasong robbery with homicide laban sa mga suspek habang patuloy ang pangangalap ng karagdagang ebidensya bago ito isampa sa Provincial Prosecutor's Office.
Ayon sa pulisya, positibong kinilala ng live-in partner ni Carpenter ang dalawang naarestong suspek. Nananatili naman siyang person of interest (POI) at nasa ilalim ng police protection bilang nag-iisang saksi sa pamamaril.
Sinabi rin ng pulisya na wala silang nakuhang baril mula sa mga suspek sa oras ng pag-aresto at pagsuko.
Samantala, sinabi ni PNP spokesperson Col. Allen Rae Co na pinaghahanap pa ang ikaapat na suspek na kinilala lamang sa alyas na “Eden.”
Nanawagan ang Philippine National Police sa publiko na magbigay ng anumang impormasyon na maaaring makatulong sa agarang pag-aresto sa natitirang suspek.
Batay sa paunang imbestigasyon, lumalabas na ang motibo ng mga suspek ay pagnanakaw at wala pang ebidensya na may ibang taong nag-utos sa krimen.
Si Carpenter, isang kilalang marine biologist at conservation scientist, ay binaril at napatay sa loob ng kanyang bahay sa Barangay Ajong, Sibulan noong Hulyo 12. Kilala siya sa kanyang mahigit limang dekadang pananaliksik sa yamang-dagat ng Pilipinas at sa pagiging co-author ng pag-aaral na nagdeklara sa Verde Island Passage bilang sentro ng pandaigdigang marine shore fish biodiversity.
