Itinalaga ni Pangulong Ferdinand R. Marcos Jr. si Dr. Jose S. Pujalte Jr. bilang bagong kalihim ng Department of Health (DOH) upang pangunahan ang pagpapalakas ng healthcare system ng bansa at pagpapabuti ng access ng mga Pilipino sa de-kalidad na serbisyong pangkalusugan.
Sa isang press briefing sa Malacañang, sinabi ni Presidential Communications Office (PCO) Undersecretary at Palace Press Officer Claire Castro na dala ni Pujalte ang mahigit 30 taong karanasan bilang doktor, hospital administrator, guro, at lingkod-bayan.
Ayon kay Castro, papalitan ni Pujalte si dating Health Secretary Teodoro Herbosa, na nagbitiw sa puwesto dahil sa kadahilanang pangkalusugan.
Nagsimula si Pujalte sa DOH noong 1991 at natapos ang kanyang orthopedic residency sa Philippine Orthopedic Center noong 1994. Nagtapos siya ng medisina sa University of the Philippines College of Medicine at kumuha ng Master's Degree in Hospital Administration sa Ateneo Graduate School of Business.
Noong 2008, kinilala siya bilang Career Executive Service Eligible at nagsilbi ring guro sa University of the Philippines Manila, FEU Nicanor Reyes Medical Foundation, at San Beda College of Medicine.
Ayon sa Malacañang, inaasahang ipagpapatuloy ni Pujalte ang mga programa ng administrasyong Marcos upang higit pang mapatatag ang healthcare system ng bansa, mapalawak ang access sa de-kalidad na serbisyong medikal, at maisulong ang mas mabuting kalusugan para sa lahat ng Pilipino.
