Natapos noong July 3 ang pamamahagi ng cash-for-training (CFT) at meal allowance sa mga college student-beneficiaries ng Tara, Basa! Tutoring Program (TBTP) sa Romblon.
Isinagawa ang payout sa San Fernando Plaza noong July 1 para sa mga benepisyaryo mula sa Sibuyan Island, habang isinagawa naman ito sa Odiongan Covered Court mula July 1 to 3 para sa mga benepisyaryo mula sa Tablas Island.
Sa kabuuan, 886 Tutors at Youth Development Workers (YDWs) sa MIMAROPA ang tumanggap ng cash-for-training at meal allowance bilang bahagi ng implementasyon ng Tara, Basa! Tutoring Program ngayong 2026.
Ayon sa Department of Social Welfare and Development (DSWD), kinikilala ng programa ang dedikasyon at mahalagang ambag ng mga tutors at YDWs sa pagpapahusay ng kakayahan sa pagbasa ng mga batang mag-aaral sa kanilang mga komunidad.
Sa ilalim ng programa, nagsisilbing tutors ang mga college students upang tulungang mapaunlad ang literacy skills ng mga batang nahihirapang bumasa, habang ang mga YDWs naman ang nagsasagawa ng mga sesyon para sa mga magulang at tagapag-alaga upang mas mapalakas ang kanilang suporta sa pagkatuto ng mga bata.
Sa pamamagitan ng pagtutulungan ng DSWD, Tara, Basa! Tutoring Program, at mga katuwang na pampubliko at pribadong institusyon, nabibigyan ang mga kabataan ng pagkakataong makapaglingkod sa kanilang komunidad, mapaunlad ang kanilang kakayahan, at makatanggap ng pinansyal na suporta habang tumutulong sa pagpapataas ng kalidad ng edukasyon sa kanilang mga pamayanan.
Discussion about this post