Pormal nang inilunsad ng Technical Education and Skills Development Authority (TESDA) Romblon ang WorldSkills Philippines (WSP) Romblon 2026 provincial competition nitong Abril 28 sa Romblon National Institute of Technology (RNIT) sa Alcantara, Romblon.
Tampok sa kompetisyon ang mga kalahok mula sa iba’t ibang bayan ng lalawigan na magpapakita ng kanilang husay sa tatlong larangan: Bakery, Refrigeration and Air-Conditioning, at Wall and Floor Tiling.
Sa kanyang mensahe, ipinaliwanag ni TESDA Romblon Provincial Director Glenn Niño M. Sartillo ang bagong branding ng kompetisyon na aniya’y sumasalamin sa mas modern at world-class na pamantayan ng technical-vocational education at training (TVET).
Nagpasalamat din si Sartillo sa suporta ng iba’t ibang ahensya at sektor na tumulong sa pagsasagawa ng aktibidad.
Samantala, sa mensahe ni Chief of Staff Denon Madrona Jr., na kumatawan kay Congressman Eleandro Jesus “Budoy” Madrona, binigyang-diin ang kahalagahan ng TVET bilang daan sa trabaho at kabuhayan.
Pormal na binuksan ang kompetisyon sa pamamagitan ng flag raising ng WSP at ceremonial lighting of the torch bilang simbolo ng dedikasyon at kahusayan ng mga kalahok.
Layunin ng WorldSkills Philippines na hubugin ang kasanayan ng mga kabataan at ihanda sila sa mas mataas na antas ng kompetisyon sa larangan ng technical skills sa bansa at maging sa international stage.
Samantala, dumalo rin sa pagbubukas ng programa sina Anna Christina Martinez, Vocational School Administrator II ng RNIT; Joseph Coching, Acting Administrator ng PTC Romblon; Alcantara Mayor Riza Galicia Pamorada; at si Nicasio Fiedacan Jr. na kumatawan kay Governor Trina Firmalo-Fabic.
