Mas pinabilis at pinasigla ang pamamahagi ng scholarship allowances at training support funds ng Technical Education and Skills Development Authority (TESDA) sa lalawigan ng Romblon sa pamamagitan ng pakikipagtulungan nito sa Land Bank of the Philippines (LANDBANK).
Sa panayam ng PIA Romblon, sinabi ni TESDA Romblon Provincial Director Glenn Niño M. Sartillo na ang inisyatiba ay bahagi ng nationwide program na isinulong ni Kiko Benitez upang gawing mas episyente at ligtas ang distribusyon ng pondo sa mga benepisyaryo.
Sa ilalim ng kasunduan, gagamitin ng TESDA ang ATM Payroll Facility ng LANDBANK upang direktang ma-credit ang allowance ng mga scholar sa kanilang account, na inaasahang magpapalakas ng transparency at magtitiyak ng mas mabilis at maayos na disbursement ng pondo.
Sa Romblon, isinagawa na ang pilot implementation nito sa Romblon National Institute of Technology kung saan natatanggap na ng mga scholar ang kanilang allowance gamit ang LANDBANK PISO ATM card.
Ayon kay Sartillo, kung dati ay nagkakaroon ng delay sa pamamahagi ng allowance, lalo na sa mga malalayong lugar dahil sa kakulangan ng disbursement officers, ngayon ay mas napapabilis na ang proseso kahit sa mga geographically isolated na lugar.
Isinasagawa ang payout sa pamamagitan ng auto-credit gamit ang LANDBANK weAccess facility, na pinopondohan mula sa Payroll Fund o Modified Disbursement System (MDS) Account ng TESDA.
Para sa mga benepisyaryong walang bank account, maaaring magbukas ng LANDBANK PISO Account na nangangailangan lamang ng ₱1 initial deposit, walang maintaining balance, at may maximum na ₱50,000 na limit sa balanse o buwanang credit. May kasama rin itong libreng ATM card.
Maaari ring mag-avail ang mga kwalipikadong benepisyaryo na 18 taong gulang pataas ng LANDBANK PISO Plus Account na walang initial deposit at may kasamang virtual Visa debit card, na maaaring buksan sa pamamagitan ng LANDBANK Mobile Banking App gamit ang isang valid ID o TESDA endorsement.
Bukod sa pagpapabilis ng payout, layunin din ng programa na maipakilala ang mga TESDA scholar sa formal banking system, na magbibigay sa kanila ng kakayahang mag-ipon, mag-withdraw, mag-transfer ng pondo, at magsagawa ng digital payments habang tinatapos ang kanilang technical at vocational education.
