Makakatanggap ng tulong pinansyal ang mga miyembro ng tricycle operators and drivers associations (TODA) sa lalawigan ng Romblon na apektado ng mataas na presyo ng gasolina, ayon sa Department of Social Welfare and Development.
Ayon kay Abegail Fetilo, Social Welfare and Develoment Team leader sa Romblon, tuloy ang pamamahagi ng fuel subsidy sa Abril 16 sa lalawigan matapos ang naunang distribusyon sa Calapan at Puerto Princesa City sa rehiyon ng MIMAROPA.
Batay sa iskedyul, isasagawa ang payout sa Abril 16 sa mga bayan ng Odiongan, Alcantara, San Andres, Calatrava, Looc, Santa Fe, at Santa Maria. Susundan ito sa Abril 17 sa San Agustin, habang magpapatuloy ang pamamahagi mula Abril 17 hanggang 20 sa mga bayan ng Sibuyan Island at Romblon Island.
Ang programa ay bahagi ng direktiba ni Pangulong Ferdinand R. Marcos Jr. na tiyaking walang public utility vehicle driver ang maiiwan sa gitna ng epekto ng pagtaas ng presyo ng langis. Sa pinakahuling datos, umabot na sa 259,979 tricycle drivers sa labas ng Metro Manila ang nakatanggap ng tig-₱5,000 cash relief assistance mula Abril 8 hanggang 10, na may kabuuang halos ₱1.3 bilyon na naipamahagi ng DSWD.
Ayon kay DSWD Assistant Secretary Irene Dumlao, patuloy ang pamamahagi ng tulong hanggang maabot ang lahat ng target na benepisyaryo sa buong bansa, lalo na ang mga driver na nahihirapan sa pagtaas ng gastos sa krudo at araw-araw na boundary.
Sinabi ni Fetilo na layunin ng programa na mabigyan ng direktang tulong ang mga TODA drivers sa Romblon upang matulungan silang matugunan ang kanilang pang-araw-araw na gastusin.
Dagdag pa niya, matapos ang pamamahagi sa TODA members ay isusunod naman ang iba pang sektor na apektado ng mataas na presyo ng gasolina tulad ng mga habal-habal drivers, delivery riders, at mga tsuper ng public utility jeepney.
