Binigyang-diin ang kahalagahan ng pagkakaisa at patuloy na pagtatanggol sa kalayaan sa paggunita ng ika-81 Anibersaryo ng Liberation of the Islands of Romblon and Panay ngayong Marso 18, 2026.
Sa isinagawang programa sa Barangay Sawang, na dinaluhan ng iba’t ibang ahensya ng pamahalaan at mga stakeholder bilang pag-alala sa kabayanihan ng mga gerilya at sundalo na lumaban para sa kalayaan noong 1945, binigyang-diin ni Andrea Marie Andres, Police Captain at Legal Officer ng Romblon Police Provincial Office, na nananatiling mahalaga ang mga aral ng kasaysayan sa kasalukuyang panahon, lalo na sa harap ng mga umiiral na hamon sa bansa at sa buong mundo.
Binigyang-pansin niya ang sitwasyon sa West Philippine Sea, kung saan patuloy umanong nakararanas ng panggigipit ang mga mangingisdang Pilipino. Ayon sa kanya, patuloy ang pagbabantay at pagprotekta ng mga tauhan ng Philippine Coast Guard, Armed Forces of the Philippines, at Philippine National Police upang ipagtanggol ang teritoryo ng bansa at karapatan ng mga mamamayan.
“In the West Philippine Sea, Filipino fishermen continue to face harassment and intimidation for simply trying to earn a living. Our PCG, our Armed Forces, our PNP, and other uniformed services continue to patrol and protect our maritime territories. They do so not to provoke, but to defend what rightfully belongs to the Filipino people,” ayon kay Andres.
Ipinaliwanag din ni Andres na ang mga nagaganap na sigalot at digmaan sa iba’t ibang panig ng mundo ay nagpapaalala na ang kapayapaan at kalayaan ay hindi lamang bahagi ng nakaraan kundi patuloy na dapat pinangangalagaan.
Aniya, hindi lamang mga nasa uniporme ang may tungkulin sa pagtatanggol sa bansa, kundi ang bawat Pilipino ay may responsibilidad na mag-ambag sa pagpapanatili ng kapayapaan at kaayusan.
Binigyang-diin din niya na sa kabila ng pagkakaiba-iba ng pananaw, paniniwala, at pulitika sa kasalukuyan, dapat alalahanin ang ipinakitang pagkakaisa ng mga bayani ng Romblon noong panahon ng digmaan, na nagkaisa para sa kalayaan ng bansa.
“And today, we must admit something honestly: there are many things that divide us—politics, opinions, beliefs. But when the heroes of Romblon fought in 1945, they did not ask each other what their political views were. They did not ask whether they agreed on everything. They helped one another because they knew that the country needed them,” pahayag ni Andres.
Hinimok niya ang publiko na magsimula sa simpleng paraan tulad ng pagtutulungan, paggalang sa isa’t isa, at pagsuporta sa mga sektor na nagbabantay sa bansa, kabilang ang mga mangingisda at mga uniformed personnel.
Ayon pa kay Andres, ang tunay na lakas ng isang bansa ay hindi lamang nasusukat sa armas kundi sa pagkakaisa ng mamamayan nito.
“So if the time ever comes when our country faces great challenges again, I hope we will remember the bravery of the guerrillas of Romblon,” dagdag pa ni Andres.
Ang Liberation of Romblon at Panay ay taun-taong ginugunita sa probinsya tuwing Marso 18 at idineklara rin itong Special Non-Working Holiday sa buong lalawigan.
