Inaprubahan ng House of Representatives sa ikalawang pagbasa ang panukalang batas na naglalayong tanggalin ang travel tax na binabayaran ng mga Pilipinong bumibiyahe palabas ng bansa.
Sa plenary session noong Miyerkules, inaprubahan sa pamamagitan ng viva voce o voice vote ang House Bill No. 8464. Isinulong ang panukala ni Romblon Representative Eleandro Jesus Madrona, na siyang chairperson ng House Committee on Tourism.
Matapos ang deliberasyon, pinayagan ni Deputy Speaker Yevgeny Emano ang mosyon upang aprubahan ang panukala sa ikalawang pagbasa.
Nauna nang tinalakay ang panukala sa House Committee on Appropriations, na siyang ikatlo at huling komiteng nagrepaso sa panukala, habang naaprubahan din ito ng House Committee on Ways and Means isang araw bago ang plenary deliberation.
Kapag naisabatas, aalisin ng panukala ang travel tax na ipinapataw sa ilalim ng Presidential Decree No. 1183 at ilang probisyon ng Tourism Act of 2009.
Sa kasalukuyan, umaabot sa P2,700 ang travel tax para sa first-class passengers at P1,620 naman para sa economy-class travelers na bumibiyahe palabas ng bansa.
Ayon kay House Majority Leader Ferdinand Alexander Marcos, isa sa mga may-akda ng panukala, matagal nang ipinataw ang travel tax sa ibang konteksto ng ekonomiya at ngayon ay nagiging dagdag na pasanin na lamang ito sa mga biyahero.
Sa ngayon, tinatayang umaabot sa P8 bilyon kada taon ang nalilikom mula sa travel tax. Ang pondong ito ay napupunta sa Tourism Infrastructure and Enterprise Zone Authority (TIEZA), Commission on Higher Education (CHED), at National Commission for Culture and the Arts (NCCA).
Nagpahayag naman ng pangamba ang CHED sa posibleng pagkawala ng pondo mula sa travel tax dahil bahagi nito ang napupunta sa Higher Education Development Fund sa ilalim ng Republic Act No. 7722.
Gayunman, sinabi ni House Committee on Appropriations Chairperson at Nueva Ecija Representative Mikaela Angela Suansing na suportado ng komite ang pagtanggal ng travel tax ngunit kailangan ding tiyakin na mapupunan ang posibleng kakulangan sa pondo ng mga ahensyang maaapektuhan.
Ayon kay Suansing, nakipag-ugnayan na ang komite sa Department of Finance (DOF) at Department of Budget and Management (DBM) upang matiyak na may sapat na pondo para sa mga ahensyang kasalukuyang umaasa sa nalilikom mula sa travel tax.
Ang panukalang pagtanggal ng travel tax ay kabilang din sa 21 priority measures na itinakda ng Legislative-Executive Development Advisory Council (LEDAC) bilang bahagi ng mga prayoridad na batas ng pamahalaan.
