Nag-anunsyo ang Montenegro Shipping Lines ng pagtaas sa pamasahe ng pasahero sa halos lahat ng kanilang ruta, kabilang na ang mga biyaheng papunta at paalis ng lalawigan ng Romblon.
Ayon sa shipping company, ang hakbang ay bunsod ng patuloy na pagtaas ng presyo ng fuel na nakaapekto sa operasyon ng mga barko, na iniuugnay sa umiigting na tensyon at kaguluhan sa Middle East.
Batay sa inilabas na bagong fare matrix ng Montenegro Shipping Lines, ang pamasahe sa rutang Batangas patungong Odiongan at pabalik ay nasa P1,989 na para sa Regular Mabuhay accommodation habang P1,530 naman para sa regular economy.
Sa rutang Odiongan patungong Romblon at pabalik, aabot na sa P576 ang regular na pamasahe.
Samantala, ang pamasahe mula Lucena patungong San Agustin at pabalik ay nasa pagitan na ng P1,116 hanggang P1,451, habang ang Lucena patungong Romblon at pabalik ay P1,212 hanggang P1,576 na ang regular fare.
Para naman sa rutang Lucena patungong Magdiwang at pabalik, nasa P1,440 hanggang P1,872 na ang regular na pamasahe.
Sa loob naman ng Sibuyan Island, ang pamasahe mula San Agustin patungong Romblon at pabalik ay P144 na, habang ang Romblon patungong Sibuyan at pabalik ay nasa P323.
Ang rutang San Agustin patungong Magdiwang at pabalik ay nasa P459 na ang regular fare.
Tumaas din ang pamasahe mula Roxas sa Oriental Mindoro patungong Odiongan at pabalik na ngayon ay P725 na ang regular fare.
Samantala, ang bagong rutang Looc patungong Caticlan at pabalik ay nasa P600 na ang regular na pamasahe.
Mananatili naman ang mga diskwento para sa mga estudyante, senior citizen, at persons with disabilities alinsunod sa umiiral na mga batas.
Bukod sa pamasahe ng mga pasahero, nagtaas din ang Montenegro Shipping Lines ng singil para sa mga rolling vehicles, na nag-iiba depende sa pantalan na pinanggalingan at patutunguhan.
Ayon sa kumpanya, makikita ang kumpletong fare matrix sa kanilang opisyal na Facebook page.
