Isang bahay na gawa sa light materials ang natupok ng apoy madaling araw ng Marso 3 sa Sitio Baligsot, Barangay Alegria sa isla ng Simara.
Ang nasunog na bahay ay pagmamay-ari ng mag-asawang sina Gemalyn Faner at Rolin Amar. Batay sa paunang ulat, pasado alas-3 ng madaling araw nang sumiklab ang sunog sa kanilang tirahan sa hindi pa matukoy na dahilan.
Ayon sa mag-asawa, mahimbing silang natutulog nang mangyari ang insidente kaya’t hindi nila matiyak kung saan nagsimula ang apoy. Mabilis umano itong kumalat dahil yari sa light materials ang kanilang bahay.
Wala namang naiulat na nasugatan sa insidente, subalit hindi na umano nakapagsalba ng anumang gamit ang mag-asawa dahil sa bilis ng pagliyab ng apoy.
Nagpaabot na ng agarang tulong ang lokal na pamahalaan ng Corcuera sa mga naapektuhang residente habang patuloy ang imbestigasyon upang matukoy ang sanhi ng sunog.
