Tatlong residente ng Brgy. Concepcion Norte ang inaresto ng pulisya matapos maaktuhan umano sa pagbebenta ng ilegal na droga sa isinagawang buy-bust operation sa loob ng isang pinaghihinalaang drug den sa nasabing lugar, ayon sa ulat ng pulisya.
Pinangunahan ng Philippine Drug Enforcement Agency Romblon ang operasyon katuwang ang Romblon Police Provincial Office kagabi, February 20.
Batay sa police report, umabot sa tinatayang 12 gramo ng hinihinalang shabu ang nakumpiska mula sa mga suspek, kabilang ang mga narekober sa kanilang posesyon sa panahon ng operasyon. Tinatayang nagkakahalaga ang mga ito ng humigit-kumulang P81,600 batay sa standard drug price.
Matapos ang operasyon, agad na dinala sa Sta. Maria Municipal Police Station ang mga naarestong indibidwal para sa kaukulang dokumentasyon. Samantala, siyam na sachet ng pinaghihinalaang shabu ang itinurn-over sa Philippine Drug Enforcement Agency (PDEA) MIMAROPA para sa laboratory examination.
Mahaharap ang mga suspek sa kasong paglabag sa Republic Act 9165 o ang Comprehensive Dangerous Drugs Act of 2002.
