Dumating sa bayan ng San Agustin si National Dairy Authority (NDA) Administrator Marcus Antonius Andaya upang makipagpulong sa mga alkalde ng lalawigan kaugnay ng pagpapalawak ng mga programa ng ahensya sa Romblon.
Sa panayam ng PIA Romblon, sinabi ni Andaya na layunin ng NDA na ipakilala at palakasin ang lokal na paggagatas ng baka sa probinsya upang magkaroon ng sapat na suplay ng gatas para sa mga feeding program ng pamahalaan.
“Gusto namin iparating dito sa Romblon ’yung mga programa ng DA-National Dairy Authority pagdating sa pag-aalaga ng baka. Gusto naming ipaalam sa mga mayors dito na ’yung mga malalaking lupa dito na hindi nagagamit ay magamit sa pag-aalaga ng baka at pagtatanim ng mga corn,” pahayag ni Andaya.
Dagdag pa niya, ipapakita ng ahensya sa mga alkalde kung saan maaaring makapasok ang mga magsasaka sa industriya ng paggagatas, lalo na ngayong inaasahang tataas ang demand dahil sa Milk Feeding Program ng Department of Education at iba pang feeding programs ng mga lokal na pamahalaan.
“Lokal na sana ang mag-supply pero ang napag-alaman ko ay wala tayo sa Romblon. Kung meron lang sana ditong lokal na gatas, ’yung mga magsasaka natin dito sa gatas ang makikinabang doon,” ani Andaya.
Ayon pa sa opisyal, aabot sa ₱3 bilyon ang gagamitin ngayong 2026 para sa Milk Feeding Program ng DepEd, subalit hindi pa sapat ang kasalukuyang suplay ng gatas sa bansa. Sinabi rin ni Andaya na handa ang NDA na magbigay ng subsidiya sa mga magsasaka, kabilang ang pamamahagi ng baka o kambing, bilang bahagi ng programang pangkabuhayan.
Samantala, isa umano ang nasabing proyekto sa mga programang isinusulong ni Congressman Eleandro Madrona para sa lalawigan. Kaugnay nito, ipinadala niya ang kanyang Chief of Staff na si dating San Agustin Mayor Denon Madrona sa Western Visayas kasama ang mga opisyal ng NDA para sa isang benchmarking activity upang makakuha ng ideya kung paano ito maisasakatuparan at mailulunsad sa Romblon.
