Hinikayat ni Congressman Budoy Madrona ang mga estudyante ng Romblon State University (RSU) na piliin ang kursong may kaugnayan sa agrikultura at pangingisda, sa isang dayalogo na isinagawa kasama ang mga opisyal ng RSU at mga estudyanteng nagtapos sa summer enrichment camp sa Dalhousie University sa Canada.
Ayon kay Madrona, mahalagang maengganyo ang kabataan na pumasok sa larangan ng agriculture at fisheries, lalo na't ito ang may pinakamalaking potensyal sa pag-unlad ng lalawigan ng Romblon.
“’That's one knowledge I want those students to feel and see,” pahayag ni Madrona.
“From the results of your visit, it is my hope and dream that you will be able to entice not only your classmates here in the university but also incoming senior high school students who are intending to enroll in agriculture or fisheries in the university—to get more interested and accept that these courses are the best for us here in the province of Romblon,” dagdag pa nito.
Binigyang-diin ni Madrona na ang sektor ng agrikultura at pangisdaan ay susi sa tunay na pag-unlad ng lalawigan, lalo pa’t marami pa ring mga lupain ang hindi napapakinabangan.
Naniniwala siyang kung mabibigyan ng sapat na kaalaman at suporta ang mga kabataang Romblomanon, hindi na kakailanganing umangkat ng mga produktong agrikultural mula sa ibang probinsya—bagkus ay maaari pa silang makapag-export.
Dagdag pa niya, ang karanasang natamo ng 18 estudyante at tatlong guro sa Canada ay magsisilbing binhi ng kaalaman na maaaring magbunga ng mas marami pang oportunidad para sa iba pang kabataan sa RSU.
Ang nasabing talumpati ay bahagi ng dayalogo kasunod ng pagbabalik ng delegasyon mula sa summer enrichment camp na isinagawa sa Dalhousie University, kung saan tinalakay ang mga natutunan at mga posibleng aplikasyon nito sa lokal na konteksto ng Romblon.
Sa huli, ipinaabot ni Madrona ang kanyang pasasalamat sa mga bagong estudyante ng agriculture at fisheries, at nangakong patuloy niyang susuportahan ang mga programang magpapalakas sa sektor na ito sa lalawigan.
