Itinuro ng Asian Terminals Inc.-Batangas (ATIB) ang mataas na operational expenses bilang pangunahing dahilan ng kanilang panukala na itaas mula P30 hanggang P100 ang passenger terminal fee sa Batangas Port.
Sa liham na ipinadala ni Peter Francis Dimayuga ng ATIB kay Konsehal Miguel Gabriel Montojo ng Romblon, ipinaliwanag ng kumpanya na umaabot sa 50% ng kita ng pantalan ang ginugugol sa pang-araw-araw na operasyon.
Bukod dito, 30% naman ang nakalaan sa seguridad, kaligtasan, at sahod ng mga manggagawa, habang ang natitirang 20% ay para sa patuloy na pagpapabuti ng mga pasilidad sa terminal.
Ayon kay Dimayuga, ang kasalukuyang P30 na singil ay hindi na sapat upang mapanatili ang kalidad ng serbisyo at imprastruktura ng terminal.
Dagdag pa ng ATIB, ginastusan nila ng humigit-kumulang ₱1.5 bilyon ang pagpapagawa ng bagong terminal building .
Sinabi rin ni Dimayuga na kapalit ng planong pagtaas ay ang pagpapatuloy ng paggamit ng publiko sa mga world-class amenities ng terminal tulad ng malinis na comfort rooms, clinic, ambulansya, playrooms, breastfeeding station, shuttle service, at iba pa.
Ang panukalang pagtaas ng terminal fee ay bahagi ng isinumiteng aplikasyon ng ATIB sa Philippine Ports Authority (PPA) noong Oktubre 2024 na kasalukuyang pinag-aaralan ng gobyerno.
