Isa ang kalusugan at edukasyon sa mga pangunahing tututukan ni Odiongan Vice Mayor Diven Fos Dimaala sakaling pagkatiwalaan siyang maging susunod na alkalde ng bayan sa darating na halalan.
Sa isang panayam, ibinahagi ni Dimaala ang kanyang konkretong mga plano para sa sektor ng kalusugan. Kabilang dito ang pagtatayo ng Odiongan Community Hospital na layuning mas mapalapit ang serbisyong medikal sa mga Odionganon, lalo na sa mga nasa liblib na barangay.
“Ang serbisyong medikal ay hindi dapat maging pribilehiyo, kundi karapatan ng bawat Odionganon,” pahayag ni Dimaala.
“Kaya’t sisiguraduhin nating may ospital na malapit, maayos ang pasilidad, at may sapat na doktor at nurses,” dagdag pa nito.
Bukod dito, plano rin ni Dimaala ang libreng maintenance medicine at bitamina para sa mga senior citizens, Persons with Disabilities (PWDs), at mga solo parents. Maglalaan din umano siya ng pondo para sa regular na supply ng gatas para sa mga senior citizen bilang bahagi ng pangangalaga sa kanilang nutrisyon.
Hindi rin kinalimutan ni Dimaala ang sektor ng edukasyon. Aniya, isusulong niya ang educational incentives para sa mga college students at senior high school students, lalung-lalo na ang mga nangangailangan ng tulong-pinansyal.
“Walang Odionganon na dapat huminto sa pag-aaral dahil sa kakulangan sa pera. Ang edukasyon ay daan para sa mas magandang kinabukasan,” ayon pa sa kanya.
Isa sa mga makabuluhang hakbang na nais niyang maisakatuparan ay ang pagtatatag ng Medical at Nursing School sa Odiongan, upang hindi na kailangang lumuwas pa ang mga nais kumuha ng kursong pangkalusugan.
“Kung mapagkakatiwalaan tayong mamuno, dadalhin natin ang Serbisyong May Puso sa mas mataas na antas—serbisyong totoo, mabilis, at makatao,” dagdag pa nito.
