Sa pagdiriwang ng Earth Day ngayong 2025, ipinahayag ng Green Thumb Coalition (GTC) ang opisyal na pag-endorso sa anim na kandidato sa pagkasenador, kabilang si Heidi Mendoza, para sa nalalapit na halalan.
Si Mendoza, kilala sa kanyang integridad at adbokasiya sa mabuting pamamahala, ay isinama sa listahan ng mga “green candidates” na itinuturing ng GTC bilang tagapagtanggol ng kalikasan at mga marhinalisadong sektor.
Bukod kay Mendoza, inendorso rin ng GTC sina David D’Angelo, Dodoy Ballon, Roy Cabonegro, Leody de Guzman, at Luke Espiritu. Kasama rin sa kanilang suporta ang mga partylist na Akbayan, Mamamayang Liberal, at Kamanggagawa.
Ayon kay Jaybee Garganera, co-convenor ng GTC at national coordinator ng Alyansa Tigil Mina (ATM), dumaan sa masusing pag-aaral ang proseso ng pag-endorso. “These endorsements were decided after a thorough study of the track records, platforms, and positions on environmental issues by the various candidates,” ani Garganera.
Nabatid na ang mga inendorsong kandidato ay lumahok sa Green Scorecard Survey ng GTC, kung saan ipinahayag nila ang suporta sa 11-point Green Agenda. Nilalaman ng agenda ang mga mahahalagang isyung pangkalikasan gaya ng karapatan ng kalikasan at biodiversity, makatarungang paggamit ng lupa at yaman, soberanya sa pagkain, pamamahala sa basura, hustisyang pangklima, pagmimina at extractives, makatarungang transisyon sa enerhiya, inklusibong pag-unlad, pangangalaga ng katutubo, kakayahang makabangon ng mga komunidad, at edukasyon sa klima.
Kaugnay nito, ipinahayag din ng GTC ang suporta sa mga kandidatong itinataguyod ng Green Agenda 2025 consortium sa ilalim ng “Power of Purple” report, pati na rin sa mga kandidato ng 1Sambubungan, isang koalisyon ng mga katutubong pamayanan, at ng 4K, na itinutulak ng mga katutubong kababaihan.
“Nanawagan kami sa publiko na suportahan ang mga green candidates upang maisabatas ang mga solusyong pangkalikasan at matugunan ang mga hamong dulot ng pagbabago ng klima. Sa tulong ng mga kandidatong ito, gawing pangunahing adyenda ng pamahalaan ang pangangalaga sa kalikasan,” pagtatapos ng pahayag ng GTC.
