Pumanaw na si Pope Francis ngayong umaga, Abril 21, 2025, sa edad na 88, ayon sa opisyal na anunsyo ni Cardinal Kevin Farrell, Camerlengo ng Apostolic Chamber.
Dakong 9:45 ng umaga (oras ng Roma), ipinahayag ni Cardinal Farrell mula sa Casa Santa Marta ang pagpanaw ng Santo Papa na naganap alas-7:35 ng umaga. Ani niya, “ang Obispo ng Roma, si Francis, ay nagbalik na sa tahanan ng Ama.”
Si Pope Francis ay ilang ulit nang nagkasakit sa kanyang mga huling taon, kabilang ang bronchitis at bilateral pneumonia na lumala nitong Pebrero. Matapos ang 38 araw sa ospital, bumalik siya sa Vatican upang ipagpatuloy ang paggaling ngunit hindi na nakaalpas sa kanyang karamdaman.
Si Pope Francis, o Jorge Mario Bergoglio sa tunay na pangalan, ay kilala sa kanyang malasakit sa mahihirap, kababaang-loob, at panawagan para sa pagkalinga sa kalikasan at pagkakaisa ng sangkatauhan.
Nauna nang nagpahayag ang yumaong Santo Papa ng kagustuhang gawing simple ang kanyang libing, na magsisilbing patotoo sa pananampalataya ng Simbahan sa muling pagkabuhay ni Kristo. Ang iskedyul ng kanyang funeral Mass ay hindi pa inaanunsyo.
