Isang two-day chess tournament ang nakatakdang ganapin sa bayan ng Calatrava, Romblon sa Balai Azinan Resort, Balogo, Calatrava, Romblon sa darating na Pebrero 22–23, 2025.
Ang torneo ay eksklusibo para sa lahat ng rated at unrated Romblomanon chess players saanman sa mundo. Basta’t ikaw ay isang Romblon native, malugod kang inaanyayahang sumali.
Mag-uuwi ng ₱10,000 cash prize, kasama ang trophy at medalya, ang tatanghaling kampeon ng torneo. Ang first runner-up ay makakatanggap ng ₱5,000 at medalya, habang ang second runner-up ay tatanggap ng ₱3,000 at medalya. Para naman sa third hanggang fifth runners-up, may nakalaan na ₱1,000 bawat isa. Ang torneo ay lalaruin gamit ang 7-round Swiss system format na may 20-minute time limit bawat manlalaro.
Ang paligsahang ito ay inorganisa ng Romblon Book Club at Balai Azinan.
“Layunin ng chess tournament na ito na higit pang palaguin ang komunidad ng chess sa Romblon. Marami tayong mahuhusay na manlalaro ng chess, kaya nararapat lamang na suportahan natin sila upang mas mapaunlad ang kanilang mga kakayahan. Naniniwala kami na ang paglalaro ng chess ay may tatlong mahalagang ambag sa komunidad, bukod pa sa mga pakinabang nito sa kaisipan at kalusugan: una, pagsisimula ng makabuluhang talakayan; ikalawa, paghuhubog ng kultura; at ikatlo, pagpapalalim ng samahan,” ayon sa grupo.
Hindi na bago sa bayan ng Calatrava ang ganitong uri ng torneo. Sa katunayan, nagsimula na silang mag-organisa ng chess tournaments noon pang early 2000s, ngunit natigil ito noong 2019 dahil sa pandemya. Ngayong 2025, muling babalik ang mga mainit at maaksyong labanan sa pagitan ng mga Romblomanon wood pushers.
Ilan sa mga kilalang naging kampeon sa mga nakaraang chess tournaments sa Calatrava ay sina Tony Capa ng Calatrava, Engr. Noel Mabulac ng Odiongan, Engr. Ernie Faeldonia, Nephtali Bantang ng Corcuera, at Blairy Fallarme ng Corcuera.
Inaasahan na hindi lamang mga taga-Calatrava ang lalahok kundi pati na rin ang mga manlalaro mula sa iba’t ibang bayan sa buong lalawigan ng Romblon.
Para sa mga interesadong sumali, maaaring tumawag sa 09984554197. Ang registration fee ay ₱300.
