Matagumpay na nagtapos sa ika-apat na puwesto ang Rizal Football Club sa katatapos lamang na Don Bosco Football League Tournament 2025, na ginanap sa Don Bosco Makati Football Field noong Enero 26, 2025. Ang isang araw na torneo ay nilahukan ng 16 na koponan mula sa iba't ibang kolehiyo at unibersidad, hindi lamang sa Kamaynilaan kundi pati na rin sa mga kalapit na probinsya.
Kabilang sa mga lumahok sa torneo ang Makati Football Club, Marino FC, Amianan Strikers, Ilonggo FC, Don Bosco Grey Wolves, Don Bosco Makati, 5’S Jaguar, United Futboleros De Cavite, Marist FC, Gabaldon, Phoenix Football Academy, Secret FC, A17 United, Rizers FC, at Indian FC. Sa kabila ng pagiging bagong team na nabuo lamang noong Hulyo 2024, matagumpay na nakapasok sa top four ang Rizal FC. Itinanghal na kampeon ang Secret FC, habang pumangalawa ang Ilonggo FC, at pumangatlo ang Amianan FC.
Ang Rizal Football Club ay binubuo ng mga young professionals at college students, karamihan ay mula sa probinsya ng Romblon. Nagsimula lamang ang grupo bilang isang kaswal na pagkakayayaan sa paglalaro ng football, na kalaunan ay humantong sa pagbuo ng isang opisyal na koponan. Bagamat may ilan sa kanila na magkalaban sa mga invitational tournaments sa Romblon, nagkaisa sila bilang isang team pagdating sa Kamaynilaan. Pinangalanan nilang “Rizal FC” ang kanilang koponan dahil dito sila madalas naglalaro at nagsasanay sa Rizal Football Stadium. Sa kasalukuyan, maliban sa mga manlalaro mula sa Romblon, may kasama rin silang foreign students at young professionals mula sa England, India, Africa, at Nepal.
Ilan sa mga Romblon native players ng Rizal FC ay sina Jem Paul Eurolpan mula sa Cajidiocan, Jerime Ramos mula sa RSU Cajidiocan, Jay Repe mula sa Cajidiocan at UE, Aljade Gregorio mula sa San Fernando Romblon, Mae Visca mula sa San Andres, Niel Arbis mula sa Cajidiocan at PCCR, Chonni Martos mula sa Cajidiocan at UE, Ronel Monton Oyao mula sa Magdiwang at RSU, Fritz Panican mula sa Cajidiocan, Reymark Roz mula sa Romblon Romblon at RSU, Welvin Manzo mula sa Romblon Romblon at RSU, Jade Panican mula sa San Fernando, Von Briant Mendez mula sa Odiongan at NU, Kem Fornal mula sa Romblon at RSU, Sean Romero mula sa Cajidiocan at RSU, at ang playing coach ng team na si Dexter Fajilan Faeldonia mula sa Odiongan at PUP.
Noong 2024, sumali rin ang Rizal FC sa iba't ibang torneo tulad ng Golazo Cup, Sporting Quezon City (SQC) Friendly Cup, Sporting Quezon City Beginners Cup, at ang Cajidiocan Invitational Football Tournament noong Disyembre, kung saan ang ilan sa kanilang manlalaro ay nakisama sa Foursquare Football Club.
Sa darating na Pebrero 22, 2025, muling sasabak ang Rizal FC sa Golazo Cup Tournament, kung saan maglalaban-laban ang top amateur teams mula sa iba't ibang panig ng Pilipinas, kabilang ang ilan sa mga top varsity players mula sa malalaking unibersidad sa bansa.
