Nagpahayag ng pagkadismaya si Romblon SB member Lyndon Molino sa Social Security System (SSS) Odiongan matapos ang umano’y hindi magalang na pakikitungo ng ahensiya sa isang tawag na ginawa niya upang mag-follow-up sa survivorship pension claim ng kaniyang kaibigan.
Ayon sa isang viral Facebook post ni Molino, sinubukan niyang tawagan ang SSS Odiongan upang tumulong sa isa niyang kaibigan na walang sariling cellphone.
Sa tawag, tinanong niya ang ahensiya ng, “Hello, SSS Odiongan ba ito?” ngunit ang sagot umano ay, “Tinatawagan mo na eh,” at bigla na lamang naputol ang tawag.
Ang insidente ay nagdulot ng diskusyon sa social media, kung saan marami pang ibang residente ang nagpahayag ng kanilang mga reklamo tungkol sa serbisyo kagaya ni Jose Wilson Berano.
Ayon sa kanya, pumanaw ang kanilang ama noong Abril ng 2013. Makalipas ang isang buwan, nagtungo ang kanilang nakatatandang kapatid sa SSS Odiongan upang iproseso ang survivorship pension ng kanilang ina na si Lourdes Berano. Ilang beses daw itong pinabalik sa opisina nang hindi naaayos ang proseso hanggang sa namayapa ang kanilang ina noong nakaraang taon.
Matatandaang noong nakaraang taon, nagpasa ang Sangguniang Bayan ng Romblon ng isang resolusyon na nanawagan sa SSS na pagbutihin ang kanilang serbisyo. Kabilang dito ang suhestiyon na magtayo ng sub-office sa kabisera ng Romblon upang mas mapadali ang access ng mga residente, na karaniwang kailangang bumiyahe pa sa Odiongan para sa kanilang mga transaksyon.
Ani SBM Molino, ang hindi magalang na pakikitungo ng SSS Odiongan ay tila nakasisira sa magandang tugon na ipinakita ng kanilang head office noong nakaraang taon.
Dahil sa insidente, muling nananawagan ang si Molina para sa mas maayos na serbisyo at pagkakaroon ng sub-office. Bukod sa pagbuti ng serbisyo, ito ay makakatulong din upang mabawasan ang abala at gastusin sa pagpunta ng mga residente sa Odiongan.
