Mas lalong paiigtingin ang siguridad at ang gagawing pagpapatrolya ng mga tauhan ng San Jose Municipal Police Station sa pangunguna ng kanilang bagong hepe na si Police Lt. Von Edades.
Ito ang sinabi ni Edades sa ginanap na press conference kamakailan sa bayan ng Odiongan.
Bagama't mababa ang bilang ng mga naitatalang krimen sa lugar, sinabi nito na ang gagawing paghihigpit sa siguridad ay kasabay rin ng Oplan Ligtas Summer Vacation 2023 na programa ng Philippine National Police.
“Usually, maglalagay kami ng mga tropa sa mga pantalan, at bibistahin namin ang mga tourists spots namin sa isla kung maayos ang kanilang siguridad,” pahayag ni Lt. Edades.
Mahigpit rin ang pagbabantay ng mga kapulisan sa isla lalo na pagdating sa iligal na droga dahil ang isla ay madalas pasyalan nang mga tao. Sinabi ni Lt. Edades na ang isla ay isang drug-free municipality kaya dapat umanong gawin ang nararapat para mapanatili ito.
