Hindi na kailangang iwan ng mga market vendor at iba pang self-employed worker ang kanilang kabuhayan upang makapunta sa tanggapan ng Social Security System (SSS), matapos ilapit ng ahensya ang mga serbisyo nito sa mga komunidad sa pamamagitan ng SSS E-Wheels Palengke Caravan.
Bahagi ito ng simultaneous Palengke Caravan na isinagawa sa Luzon, kung saan nag-deploy ang SSS Lipa Branch ng E-Wheels sa Lipa City Public Market upang direktang matulungan ang mga manggagawa sa informal economy.
Ayon kay SSS Vice President for Luzon South 2 Division Rowela Cristina R. Macasadia, isinagawa ang programa upang gawing mas madali at accessible ang mga SSS transaction para sa mga vendor na hindi madaling makaalis sa kanilang puwesto dahil nakasalalay dito ang kanilang araw-araw na kita.
“We understand the plight of our market sellers and ambulant vendors who are unable to attend to their SSS-related concerns because they cannot leave their livelihoods unattended. This caravan is for them. We aim to serve them without the need to leave their workplace and forego a day’s income to complete their SSS transactions,” ani Macasadia.
Sa isinagawang on-site assistance, mahigit 300 miyembro ang natulungan sa iba't ibang transaksyon. Kabilang dito ang aplikasyon para sa Social Security (SS) number, pagkuha ng Payment Reference Number (PRN), pagpapabago ng member data, enrollment ng disbursement account, at Annual Confirmation of Pensioners (ACOP).
Hindi lamang sa Lipa isinagawa ang naturang serbisyo. Kasabay ding nagpatupad ang SSS Luzon South 2 Division ng E-Wheels Palengke Caravan sa iba't ibang lugar sa MIMAROPA, partikular sa Mindoro, Marinduque, Romblon at Palawan.
Sa pamamagitan ng mobile service, patuloy na dinadala ng SSS ang mga pangunahing serbisyo nito sa mga lugar na may limitadong access sa mga tanggapan ng ahensya, partikular sa mga underserved at unserved communities.
Layunin ng programa na mas maraming miyembro ang makapag-avail ng social security services nang mas madali at hindi na kinakailangang bumiyahe pa sa malalayong tanggapan para lamang sa kanilang mga transaksyon.
Hanggang July 2026, nakapagsagawa na ang SSS Luzon South 2 Division ng 266 E-Wheels activities sa buong rehiyon. Sa mga aktibidad na ito, umabot sa 19,285 miyembro mula sa disadvantaged communities ang napagserbisyuhan.
Ipinapakita ng programa ang patuloy na pagsisikap ng SSS na ilapit ang serbisyo nito sa mga miyembro, lalo na sa mga manggagawang kailangang pagsabayin ang kanilang mga responsibilidad sa kabuhayan at pag-aasikaso ng kanilang social security concerns.
Discussion about this post