Pinalalakas ng Police Regional Office MIMAROPA (PRO MIMAROPA) ang ugnayan nito sa mga paaralan, pamilya at komunidad sa pamamagitan ng Project POPULAR (Police-to-Population Ratio) upang maisulong ang mas ligtas na learning environment at mapabilis ang pag-uulat ng mga security concern.
Sa ilalim ng pamumuno ni Regional Director PBGEN Christopher R. Dela Cruz, inatasan ang mga police unit sa rehiyon na paigtingin ang koordinasyon sa Department of Education, mga school authority, lokal na pamahalaan, barangay officials, mga magulang at iba pang stakeholder.
Ang Project POPULAR ay isang community-oriented policing initiative na naglalayong palakasin ang direktang komunikasyon sa pagitan ng pulisya at mga komunidad sa pamamagitan ng barangay engagement, household visits, community coordination at mga accessible na paraan ng pag-uulat ng mga usapin sa peace and security.
Binigyang-diin ng PRO MIMAROPA ang kahalagahan ng inisyatiba kasunod ng mga insidente ng karahasan na maaaring makaapekto sa seguridad sa mga paaralan, kabilang ang naiulat na pamamaril sa Banga National High School sa South Cotabato.
Ayon kay Dela Cruz, mahalaga ang maagang pag-uulat at koordinasyon upang masuri at matugunan agad ang mga lehitimong security concern bago pa ito lumala.
“The safety of our learners is a shared responsibility, and it begins with keeping our lines of communication open with our schools, families, barangays, and communities,” ani Dela Cruz.
Dagdag niya, nais ng Project POPULAR na matiyak ng publiko na madaling malapitan ang kanilang mga pulis para makinig at tumugon sa mga lehitimong concern na maaaring makaapekto sa kanilang kaligtasan.
Hinikayat ng PRO MIMAROPA ang mga estudyante, magulang, guro, school personnel at iba pang miyembro ng komunidad na agad iulat sa mga itinalagang school, barangay o police channels ang mga mapagkakatiwalaang banta, kahina-hinalang aktibidad at iba pang impormasyong maaaring makaapekto sa school safety.
Kasabay nito, pinaalalahanan ng pulisya ang publiko na tiyaking beripikado muna ang impormasyon bago ito ibahagi, lalo na kung may kinalaman sa mga menor de edad. Hinikayat din ang publiko na huwag magpakalat ng hindi beripikado o nakakagambalang mga larawan at video na maaaring magdulot ng hindi kinakailangang pangamba o higit pang makaapekto sa mga sangkot.
Ayon sa PRO MIMAROPA, ipatutupad ang Project POPULAR alinsunod sa human rights standards, data privacy requirements at mga umiiral na polisiya ng PNP sa pangangasiwa ng impormasyong nakukuha sa community engagement.
Patuloy namang palalakasin ng PRO MIMAROPA ang pakikipagtulungan nito sa mga paaralan, pamilya, barangay, lokal na pamahalaan at iba pang stakeholder sa buong rehiyon upang mapanatili ang ligtas na komunidad kung saan makapag-aaral at makalalaki nang ligtas at maayos ang mga mag-aaral.
Discussion about this post