Nakaranas ng haze ang ilang bahagi ng Metro Manila, Calabarzon at MIMAROPA, na posibleng dulot ng usok mula sa patuloy na mga sunog sa Kalimantan, Indonesia, ayon sa Department of Environment and Natural Resources-Environmental Management Bureau (DENR-EMB).
Ayon sa DENR-EMB, posibleng nagmula ang haze sa usok at transboundary haze mula sa mga sunog sa Kalimantan na maaaring tinangay patungo sa Pilipinas ng umiiral na direksyon ng hangin.
Patuloy namang mino-monitor ng DENR-EMB ang kalidad ng hangin sa pamamagitan ng kanilang network ng air quality monitoring stations upang matukoy ang lawak at posibleng epekto ng haze.
Pinayuhan ng ahensya ang publiko na iwasan ang matagal na pananatili sa labas, lalo na sa mga lugar na kapansin-pansing apektado ng haze.
Pinapayuhan din ang mga sensitibo sa polusyon sa hangin, kabilang ang mga bata at matatanda, na limitahan ang exposure sa labas at magsagawa ng kinakailangang pag-iingat.
Para naman sa mga kailangang lumabas sa mga lugar na kapansin-pansin ang haze, inirerekomenda ang pagsusuot ng maayos na face mask, partikular ang N95 o katumbas nito.
Hinimok din ng DENR-EMB ang publiko na manatiling updated sa mga opisyal na abiso at impormasyon tungkol sa kalidad ng hangin mula sa ahensya at iba pang kinauukulang tanggapan.
Samantala, naglabas din ang Quezon City government ng Air Quality Advisory at hinikayat ang mga residente, partikular ang mga kabilang sa vulnerable groups gaya ng mga bata, senior citizens, buntis, at may mga sakit sa baga at puso, na magsuot ng face mask.
Pinayuhan ang mga residente ng Quezon City na manatili muna sa loob ng kanilang mga tahanan kung kinakailangan. Para sa emergency concerns, maaaring tumawag sa Helpline 122.
Hiniling naman ng DENR-EMB sa publiko na manatiling kalmado at umasa lamang sa mga opisyal na source para sa beripikadong impormasyon hinggil sa sitwasyon ng haze.
